Хонанда Райҳон Ғаниеванинг 14-октябрь куни “Ҳумо Арена”да ўтказилиши режалаштирилган концерти бекор қилингани ижтимоий тармоқларда муҳокамаларга сабаб бўлмоқда. Хонанда ташкилотчиларни масъулиятсизлик ва ўз ишини билмасликда айбламоқда. 



“Азиз мухлисларим, концертимиз ташкилотчининг ўз ишини билмаслиги туфайли қолдирилишини маълум қиламан. Сотиб олинган барча чипталарнинг пули қайтарилади. Концерт қачон ва қаерда бўлишини эълон қиламиз”, — дейилади Райҳоннинг Instagram’да қолдирилган видеомурожаатида. 

Шундан сўнг Райҳоннинг концерти ташкилотчиси —  Arfeum компаниясининг Instagram’даги саҳифасида хонанданинг айбловига нисбатан баёнот эълон қилинди. 

“Хонанда Райхон Ғаниеванинг концертини бекор қилиш ташаббуси билан компаниямиз чиқди.
Бекор қилиш сабаби шундаки, концерт учун кучли реклама кампанияси (юқоридаги лойиҳалардан икки баравар кучли) ташкил этилганига қарамай, 3 ярим ойлик реклама ва концертга 24 кун қолганида атиги 800 га яқин чипта сотилган. Концерт зали эса 8500 томошабинга мўлжалланган.

Ушбу лойиҳага кўп куч, вақт ва ресурслар сарфланди.
Лекин, афсуски, концерт учун чипталар сотуви динамикаси бизга концертни бекор қилишдан бошқа чора қолдирмади”, — дейилади ташкилотчи компания баёнотида.