Остонадаги мактабда ўқувчи зинадан йиқилиб тушди. Директор ишдан олинди (видео)

Қозоғистон пойтахти Остонадаги 14-мактаб ўқувчиси танаффус вақтида зинадан йиқилиб тушди, деб хабар берди шаҳар таълим бошқармаси. Ижтимоий тармоқларда воқеа акс этган видео пайдо бўлди.

“14-сонли гимназия мактаби ўқувчиси иккинчи қаватга кўтарилиш чоғида зинадан йиқилиб тушди. Боланинг сўзларига кўра, уни синфдоши туртиб юборган. Воқеа жойига зудлик билан тез ёрдам машинаси чақирилган. Бола шаҳар болалар шифохонасида. Ҳуши ўзида, ҳолати барқарор. Комага тушгани йўқ. Мактаб зинапоясида панжаралар бор”, — дейилади хабарда.

Аввалроқ “НемолчиКЗ” жамоат фонди бола “реанимацияга тушиб, уч кун давомида комада бўлганини” маълум қилганди.

Мазкур воқеадан сўнг таълим муассасаси директори Дидар Байтасов ишдан бўшатилди. Информатика фани ўқитувчиси ва директор ўринборасига ҳам танбеҳ берилди.

Қозоғистон соғлиқни сақлаш вазири Ажар Гиният касалхонага ётқизилган болага бош мия жароҳати ташхиси қўйилганини маълум қилди, деб ёзади “Оrdа.kz”.

“Бугун унинг аҳволи барқарор, ихтисослаштирилган бўлимда. Кеча биз шифокорлар маслаҳатини ўтказдик, болага шошилинч жарроҳлик чоралари талаб қилинмаяпти. Бола ҳали кузатув остида бўлади”, — деди Гиният ҳукуматга.

Унинг таъкидлашича, тез ёрдам чақирилганда, шифокорларга болада шунчаки кўкаришлар борлигини айтишган. Шунинг учун тез ёрдам узоқ вақтда келган.

Болалар ҳуқуқлари бўйича вакил Динара Закиева жабрланувчи билан суҳбатлашди.

“Унинг кайфияти яхши, воқеа қандай содир бўлганини айтиб берди. У ўртоғи билан бирга дарсга югуриб кетаётган бўлган, ўртоғи тасодифан уни туртиб юборган”, — деб ёзди у Facebook’даги саҳифасида.

Тиббий кенгаш маълумотларига кўра, жарроҳлик амалиётига эҳтиёж йўқ.

Ўқувчининг йиқилиб тушиши факти билан Сарарқа туман полицияси Қозоғистон Республикаси Жиноят кодексининг 141-моддаси (Болаларнинг ҳаёти ва соғлиғи хавфсизлигини таъминлаш бўйича вазифаларни лозим даражада бажармаслик) бўйича терговга қадар текширув бошлади.

Ҳодисадан кейин Қозоғистондаги барча мактабларда текширувлар ўтказилади, деди Закиева.

“Гарчи мен бу жиноий бепарволик деб ҳисобласам ҳам, панжара ва зинапоялар орасида тўсиқ бўлмаган. Ўқув йили бошида мактаб қандай қабул қилингани ҳозир текширилмоқда. Шунингдек, барча мактабларда рейдлар ўтказилади”, — деди Болалар ҳуқуқлари бўйича вакил.