Ўзбекистоннинг Наманган вилоятида боғча болалари ва мактаб ўқувчиларини заҳарлагани тахмин қилинаётган йод халқаро қидирувдаги шахс раҳбарлик қилаётган МЧЖ томонидан ишлаб чиқарилгани ҳақида хабарлар тарқалган эди. ССВнинг Фармацевтика маҳсулотлари хавфсизлиги маркази матбуот хизмати ҳолат юзасидан баёнот берди. 
Унга кўра, ССВ ҳузуридаги “Фармацевтика маҳсулотлари хавфсизлиги маркази” давлат муассасасининг Фармацевтика фаолиятини лицензсиялаш бошқармаси томонидан “Антиструмин” дори воситасини ишлаб чиқарган “Само” МЧЖ корхонасида фармацевтик фаолият бўйича текширув ишлари олиб борилмоқда.
Текширув давомида дори воситалари ва фармацевтика фаолияти тўғрисидаги қонунчилик ҳужжатларига, жумладан, зарур ишлаб чиқариш амалиёти, зарур дистрибюторлик амалиёти, зарур сақлаш амалиёти давлат стандартларига, дори воситаларини ишлаб чиқариш, тайёрлаш, сақлаш ва улгуржи реализация қилиш доирасида техник жиҳатдан тартибга солиш соҳасидаги ҳужжатлар талабларига мувофиқ бўлиш ва корхона томонидан мажбурий риоя қилиш шарт бўлган лицензия талаб ва шартлари бўйича ҳолатлар ўрганилмоқда.
Шунингдек марказнинг аккредитациядан ўтган лабораториялари томонидан “Дори воситаларининг хавфсизлиги тўғрисидаги умумий техник регламент”га мувофиқ, “Антиструмин” дори воситасининг хавфсизлик кўрсаткичлари бўйича ўрнатилган тартибда таҳлил жараёнлари кетмоқда.
“Шу ўринда Фармацевтика маҳсулотлари хавфсизлиги маркази кенг жамоатчиликка мурожаат қилиб, тегишли ташкилотлар томонидан ушбу дори воситаси билан боғлиқ ҳолат сабаблари аниқланиб, маълум қилинмагунча, асосланмаган хабарларни тарқатмасликларини сўраб қолади”, — дейилади хабарда.
Аввалроқ Наманган вилоятида 450 нафар бола айнан шу МЧЖ томонидан ишлаб чиқарилган йоддан заҳарланиб, шифохонага мурожаат қилгани айтилганди. Соғлиқни сақлаш вазири ўринбосари Элмира Боситхонова болалар дори ёки овқатдан заҳарланмаган. Лекин ҳали буни аниқлаб улгурмадик, деганди. Шу гапни ОАВга айтган масъул, бир вақтнинг ўзида Соғлиқни сақлаш бошқармалари ҳамда “Само” МЧЖ раҳбарига хат чиқариб, болаларнинг шу йодни қабул қилишини вақтинча тўхтатиб турайлик деганди.
Наманган вилоятида болалар заҳарлангани ҳолати юзасидан Бош прокуратура томонидан Жиноят кодексининг 257-1-моддаси (санитарияга оид қонунчиликни ёки эпидемияга қарши кураш қоидаларини бузиш) билан жиноят иши қўзғатилган.
Изоҳ (0)