Тошкент шаҳар ИИББ хориждан туриб ўзини диний уламо сифатида кўрсатиб, радикал ғояларни тарқатиб келаётган фуқаролардан огоҳ бўлишга чақирди.

Маълум қилинишича, шундай фуқаролардан бири 1985 йилда Наманган вилоятида туғилган Ш.Д. бўлиб, Суриядаги “Имом ал-Бухорий катибаси” террорчилик ташкилотининг медиамаркази раҳбаридир.

2012 йил март ойида у ишлаш мақсадида Россияга борган. У ерда халқаро террорчилик ташкилоти раҳнамоларининг салбий таъсири остида жиҳодчилар диний экстремистик оқимнинг Москва жамоасига қўшилиб, жамоа етакчиларининг кўрсатмасига кўра 2014 йил февраль ойида Сурияга ўтиб, жанговар ҳаракатларда иштирок этган.

Ш.Д. Facebook’да Алихонтўра Шокиржон ўғли профилини юритиб келади. Маълумки, олим ва уламо Алихонтўра Соғуний “Девони Соғуний”, “Тарихи Муҳаммадий”, “Шифо ул-илал” каби асарлар муаллифидир. Мазкур уламо номидан фойдаланиб, интернет тармоғида ўзини Ўзбекистоннинг йирик уламоси сифатида кўрсатиб, бир неча фуқароларни халқаро террорчилик ташкилоти сафига қўшилишга даъват қилиб келган Ш.Д. аслида умуман диний таълим олмаган шахс ҳисобланади.

Унинг интернетдаги профили ҳам Ўзбекистон Олий суди томонидан экстремизм ва терроризм ғоялари билан йўғрилган деб топилган ва Ўзбекистон ҳудудига олиб кириш, тайёрлаш, тарқатиш ва намойиш этиш тақиқланган материаллар рўйхатига киритилган. 

Ш.Д.га нисбатан Ўзбекистон Жиноят кодексининг 155-2-моддаси (террорчилик фаолиятини амалга ошириш мақсадида ўқувдан ўтиш, чиқиш ёки ҳаракатланиш), 244-2-моддаси (диний экстремистик, сепаратистик, фундаменталистик ёки бошқа тақиқланган ташкилотлар тузиш, уларга раҳбарлик қилиш, уларда иштирок этиш) ва 223-моддаси (қонунга хилоф равишда чет элга чиқиш) билан жиноят иши қўзғатилиб, қидирув эълон қилинган.