Жаҳон соғлиқни сақлаш ташкилоти (ЖССТ) сўнгги йилларда вабо билан касалланиш ҳолатлари икки баравар кўпайганини маълум қилди. Ташкилот тегишли ҳисоботини эълон қилди.

2022 йилда 472 мингдан ортиқ вабога чалиниш ҳолатлари қайд этилган. Таққослаш учун, бу кўрсаткич 2021 йилда 223 мингдан ортиқни ташкил қилган. Вабо 44 давлатда аниқланган бўлиб, ўтган йили касаллик 35 давлатга тарқалган.

ЖССТ маълумотларига кўра, Афғонистон, Камерун, Конго Демократик Республикаси, Малави, Нигерия, Сомали ва Сурия ўтган йили вабодан энг кўп жабр кўрган.

“Конфликтлар, иқлим ўзгариши, мамлакат ривожига чекланган сармоя ва миграция вабо эпидемияларининг кўпайишига сабаб бўлди. Коронавирус сабабли ўрнатилган чекловларнинг тугаши, инфекциянинг олдини олиш ва назорат қилиш чораларининг камайиши ва эпидемияга қарши курашиш учун маблағларнинг камайиши бошқа касалликларга, шу жумладан, вабога ҳам таъсир қилди”, — деди ЖССТ.

Вабодан ўлим даражаси 0,5 фоизни (2349 та ҳолат) ташкил қилади. ЖССТ экспертларининг таъкидлашича, инфекция ҳақида ҳали етарли маълумотлар йўқ. Ҳар йили 1,3-4 миллион касаллик ҳолатлари ва 143 минггача ўлим прогноз қилинади.

• Вабо — ўткир диарея инфекцияси. Кўпинча бу ифлосланган озиқ-овқат ва сув истеъмоли туфайли юзага келади. Вабонинг белгилари орасида диарея, мушакларнинг тортишиши, қиёфанинг кескин ўзгариши (кўзлар ичкарига кириши, лаб ва қулоқ кўкариши), нормал ёки ҳатто паст тана ҳароратида терининг совиши, нафас қисилиши ва кучли заифлик.