Осиё тараққиёт банки (ОТБ) Ўзбекистоннинг 2023 ва 2024 йил учун иқтисодий ўсиши прогнозини яхшилади. Бу ҳақда банкнинг сентябр ойидаги шарҳида маълум қилинди.
Ҳисоботда қайд этилишича, Ўзбекистон иқтисодиёти яқин икки йилда ҳар йили 5,5 фоизга ўсади. Апрель ойида банк 5 фоизлик иқтисодий ўсишни прогноз қилганди. Прогнозни яхшилашнинг сабаблари орасида Россияга озиқ-овқат ва тўқимачилик маҳсулотлари экспортининг кўпайиши ҳамда инвестицияларнинг ўсиши кўрсатилган.
Ўзбекистон иқтисодиёти биринчи ярим йилликда 5,6 фоизга ўсган ва бу кутилганидан юқори. Бу фискал рағбатлантириш, мустаҳкам ташқи савдо, саноатнинг ўсиши ҳамда тоғ-кон саноати ва инвестицияларнинг кўпайиши билан қўллаб-қувватланган. Бироқ инфлация туфайли истеъмол секинлашган.
Шунингдек, ОТБ инфлациянинг 10 фоиздан пастга тушишини кутмаяпти. Ҳисоботда келтирилишича, нархларни либераллаштириш қисқа муддатда инфлация босимининг ошишига ёрдам беради.
Бундан ташқари, 2023 йилнинг биринчи чорагида пул ўтказмалари ҳажми 2022 йилдаги энг юқори кўрсаткичга нисбатан 55 фоизга камайган. Бунинг сабабларидан бири — Россияда ишлаётган мавсумий меҳнат муҳожирлари сонининг қисқариши.
Сентябрь бошларида Иқтисодий тадқиқотлар ва ислоҳотлар маркази томонидан Ўзбекистоннинг макроиқтисодий кўрсаткичлари таҳлил этилган чораклик ҳисоботи чоп этилганди. Марказ прогнозларига кўра, 2023 йилда Ўзбекистон ялпи ички маҳсулотининг ўсиши базавий сценарий бўйича 5,8 фоизни ташкил этиши кутилмоқда.
Изоҳ (0)