Йил якунига қадар пенсиялар миқдори оширилиши кутилмоқда. Қанча миқдорда оширилиши маълум қилинди

Ўзбекистонда йил якунигача пенсиялар миқдорини инфляция даражасидан кам бўлмаган миқдорда, жами 14 фоизга ошириш режалаштирилгани айтилди.

Олий мажлис қонунчилик палатасидаги ЎзЛиДеП фракциясининг навбатдаги йиғилиши бўлиб ўтди. Унда бир қатор муҳим қонун лойиҳалари кўриб чиқилди. “Ўзбекистон Республикасининг айрим қонунларига ногиронлиги бўлган шахсларнинг ижара муносабатларидаги ҳуқуқ ва эркинликларини янада мустаҳкамлаш ҳамда пенсияларни тайинлаш ва тўлаш тартибини такомиллаштиришга қаратилган ўзгартиришлар киритиш ҳақида”ги қонун лойиҳаси муҳокама қилинди. 

Лойиҳа билан “Фуқароларнинг давлат пенсия таъминоти тўғрисида”ги қонунига ўзгартиришлар киритилмоқда. Биринчиси — ҳар йили давлат пенсиялари миқдорини инфляция даражасида қайта ҳисоблаш, ошириб бориш тизимини жорий этиш, йил якунига қадар пенсиялар миқдорини инфляция даражасидан кам бўлмаган миқдорда жами 14 фоизга ошириш режалаштирилган. Иккинчи ўзгариш — фуқароларнинг пенсия таъминотини яхшилаш ва пенсионерларни қўллаб қувватлаш мақсадида 2024 йил 1 январдан бошлаб пенсионерга ҳисобланган, лекин ўз вақтида олинмаган пенсияни тўлаш муддати 12 ойдан 24 ойга узайтирилмоқда.

Эслатиб ўтамиз, 2023 йил учун “Ўзбекистон Республикасининг давлат бюджети тўғрисида”ги қонунга асосан, Пенсия жамғармасига давлат бюджетидан трансфертлар миқдори 15 триллион сўм бўлиши кўзда тутилган. Собиқ иқтисодиёт ва молия вазири ўринбосари Дилшод Султонов шу йилнинг март ойидаги матбуот анжуманида Пенсия жамғармаси учун 14,5 триллион сўм ташқи қарз жалб қилинишини маълум қилган.

Республикада жорий ой учун жами 4,5 миллион кишига пенсия ва нафақалар тўлаб берилган. Шундан қарийб 3,2 миллион нафар одам (72 фоиз) тўловларни банк карталарига қабул қилиб олган.