Туркия президенти Ражаб Тоййиб Эрдўғон Нью-Йоркда америкалик тадбиркор ва Tesla эгаси Илон Маск билан учрашиб, уни Туркияда Tesla заводини очишга чақирди. Бу ҳақда Туркия президенти ҳузуридаги Жамоатчилик билан алоқалар бошқармаси “Х” (собиқ Twitter) ижтимоий тармоғида хабар берди.
“Президент Ражаб Тоййиб Эрдўғон Нью-Йоркдаги Туркия уйида Tesla ва SpaceX асосчиси Илон Маскни қабул қилди”, — дейилади хабарда.
Учрашувда давлат раҳбари тадбиркорни Tesla электромобилларини ишлаб чиқарадиган еттинчи заводни Туркияда очишга чақирди. Эрдўғон, шунингдек, Туркиянинг космик дастури доирасида мамлакатнинг SpaceX билан ҳамкорликни ривожлантириш потенсиалини қайд этди ва Маскни сентябрь ойи охирида Туркиянинг Измир шаҳрида бўлиб ўтадиган технология кўргазмасида иштирок этишга таклиф қилди.
Эрдўғон БМТ Бош Ассамблеясининг 78-сессиясида иштирок этиш учун АҚШда бўлиб турибди. Туркия раҳбари Маск билан Туркиядаги сармояларни муҳокама қилмоқчи экани ҳақида аввалроқ TGRT Haber телеканали хабар берганди.
Бу Туркия раҳбари ва тадбиркорнинг биринчи учрашуви эмас. Ўтган йил охирида улар Қатарда жаҳон чемпионатининг финал учрашувида тўқнаш келганди. Ўшанда уларнинг учрашуви тафсилотлари ошкор этилмаган.
Эслатиб ўтамиз, Шавкат Мирзиёев ҳам БМТ Бош Ассамблеясининг 78-сессияси тадбирларида иштирок этиш учун амалий ташриф билан АҚШда бўлиб турибди.
Изоҳ (0)