Қирғизистонда 16 сентябрь куни Табиий ресурслар вазирлиги томонидан Миллий тозалик куни муносабати билан кенг кўламли экологик тадбир ўтказилмоқда. Бу ҳақда ташкилот матбуот хизматига таяниб, “Дарё” мухбири хабар берди.
Қирғизистон президенти Садир Жапаровнинг 2022 йил 6 сентябрдаги қарори ижроси доирасида бутун мамлакат бўйлаб расман умумхалқ тозалик куни эълон қилинган.
Вазирлик барча фуқароларни атроф-муҳитни тоза сақлаш ва яхшилаш учун кучларни бирлаштириб, ушбу ташаббусга қўшилишга чақирди.
Бундай акция биринчи марта 2022 йил 8-октябрда бўлиб ўтган. Экологик тадбирга 133 минг 508 нафар фуқаро жалб қилиниб, 600 тоннадан ортиқ чиқинди йиғилган ва утилизация қилинган.
Барча чиқиндилар эҳтиёткорлик билан сараланади ҳамда қайта ишлаш корхоналарига олиб кетилади. Бу йилги акция ҳам шу принцип бўйича амалга оширилмоқда.
Тадбирдан кўзланган асосий мақсад чиқиндиларни алоҳида йиғиш амалиётини жамиятга жорий этиш, фуқароларнинг экологик маданиятини оширишдан иборат, дейди вазирлик
Изоҳ (0)