Латвия Сейми либерал-консерватив “Янги бирлик” партиясидан бош вазир Эвика Силиня бошчилигидаги республиканинг янги ҳукуматини тасдиқлади. 48 ёшли ҳуқуқшунос раҳбарлик қиладиган Вазирлар Маҳкамасини 100 депутатдан 53 нафари қўллаб-қувватлаган, 39 нафар депутат эса қарши овоз берган. Ҳукуматнинг янги коалициясига “Янги бирлик”дан ташқари “Яшиллар ва деҳқонлар иттифоқи” ҳамда сўл-марказчи “Прогрессив” партияси ҳам кирди.
Парламентда сўзга чиққан Эвика Силиня, хусусан, Латвиянинг мудофаа бюджетини ошириш ва Украинани қўллаб-қувватлашда давом этишни ваъда қилди.
“Мудофаа бюджетини оширамиз ҳамда Қуролли кучларимизни кучайтирамиз. Биз Украинани қўллаб-қувватлаймиз”, — деди у.
Илгари Силиня Латвия фаровонлик вазири лавозимида ишлаган. Бош вазир сифатида у август ойи ўрталарида ҳукумат тарқаб кетганидан кейин истеъфога чиқишини эълон қилган партиядоши Кришянис Кариншнинг ўрнини эгаллади. Ўшанда Каринш ўзининг коалициядаги ҳамкорлари — “Қўшма рўйхат” ва “Миллий бирлашув”ни фаровонлик ва иқтисодий ўсишни таъминлаш бўйича ишларга тўсқинлик қилишда айблаганди.
Янги ҳукуматда Каринш ташқи ишлар вазири лавозимини эгаллайди.
Изоҳ (0)