Америка Қўшма Штатларидаги учта автомобиль заводида 15 сентябрь, жума куни ярим тунда United Auto Workers (UАW) автомобиль ишчилари касаба уюшмаси томонидан ташкиллаштирилган иш ташлаш бошланди.
UАW’нинг 150 минг аъзосидан 13 минг нафари учта концерннинг корхоналарида — Миссури ва Мичигандаги General Motors ва Ford, шунингдек, Американинг Chrysler ва Jeep автомобиль брендларига эгалик қилувчи Огайодаги Stellantis корхоналарида ишлашни тўхтатди.
Касаба уюшмаси тўрт йил давомида иш ҳақини 36 фоизгача оширишни талаб қилмоқда. Дастлаб UАW иш ҳақини 40 фоизга оширишни талаб қилди, чунки автомобиль ишлаб чиқарувчи йирик заводлар топ-менежерларининг даромадлари айнан мана шу миқдорда ошган эди.
Бундан ташқари, касаба уюшмаси 2008 йилдаги молиявий инқироздан кейин бекор қилинган айрим ижтимоий имтиёзларни тиклашни талаб қилмоқда. Ўз навбатида, иш берувчилар 4,5 йил давомида иш ҳақини 20 фоизга оширишни таклиф қилишди.
UАW раиси Шон Фейн касаба уюшмаси талабларини юқори инфляция ва автомобиль ишлаб чиқарувчилар фойдаси ошгани билан изоҳлади. Ford бош директори Жим Фарли CNBC телеканалига берган интервьюсида компания бундай талабларни бажара олмаслигини, чунки бу банкротликка олиб келишини айтди. Уюшма бунга жавобан Фарлига ўтган йилги даромади 21 миллион доллар бўлганини эслатиб ўтди.
Изоҳ (0)