“Дарё”да Тошкент шаҳрининг Яшнобод туманида 9 та хонадондан иборат уч қаватли уй 39 нафар кишига пуллангани билан боғлиқ фирибгарлик ҳолати очиқланганди. Сўнгра Бош прокуратура ахборот хизмати ҳолат юзасидан прокуратура органлари томонидан терговга қадар текширув ҳаракатлари ўтказилаётганини маълум қилди. Қурилиш ва уй-жой коммунал хўжалиги вазирлигининг “Дарё”га қўшимча қилишича, уй-жой харидорлари алданган.
Ушбу ҳолат вазирлик масъуллари томонидан жойига чиқиб ўрганилди. Аниқланишича, бу жой аслида якка тартибдаги уй-жой қуришга мўлжалланган жой бўлиб, 10 сотихли ҳовлида фуқаро Бабажоновага тегишли якка тартибдаги уй-жойлар борлиги аниқ бўлди. 2018 йилда бу жой олди-сотди шартномаси асосида Кулик Александр томонидан сотиб олинган. Шундан сўнг 10 сотих майдон ва қурилиш бинолари учун кадастр ҳужжати расмийлаштирилган. Чала қолган қурилиш ишларини тугатиш учун туман қурилиш бўлимига лойиҳа-смета ҳужжатларини келишиш бўйича мурожаат қилинган. Ҳужжатлар тўғрилиги сабаб, объектга якка тартибдаги уй-жой қурилиши учун ижобий хулоса берилган, — дейди вазирликнинг Бош режаларга риоя этилиши устидан давлат архитектура назорати бошқармаси бошлиғи Нодир Режабоев.
Вазирлик вакилининг билдиришича, ҳақиқатдан ҳам Яшнобод туманининг “Гўзал” маҳалласи ҳудудида якка тартибда қурилиши мўлжалланган ва шунга рухсат этилган жойда қурилиши тугалланмаган бинолар бор. Бироқ, мазкур ҳудуддан кўп қаватли турар-жой биносини қуриш учун на вазирлик ва на унинг қуйи бўғиндаги ташкилотлари томонидан рухсатнома берилган.
Шаҳарсозлик кодексининг 54-моддасига кўра, аҳоли пунктлари ҳудудида объектларни бош режасиз, бошқа зарур ҳужжатларсиз лойиҳалаштириш ҳамда қурилиш ишлари тақиқланиши белгиланган. Бундан ташқари Вазирлар Маҳкамасининг 200-сонли қарорига асосан, қаватлар сонидан қатъий назар якка тартибдаги турар жойлар ичида кўп қаватли турар жойлар қурилиши тақиқланган. Шу сабабли фуқаро лойиҳадан сўнг бир неча маротаба мурожаат қилса-да, рухсат берилмаган, — дейди масъул.
Нодир Режабоевнинг айтишича, якка тартибдаги уй-жойлар учун мўлжалланган ҳудудларда кўп қаватли турар жойлар қурилса коммуникация тармоғи билан боғлиқ муаммолар келиб чиқади.
Шу сабаб ҳеч қачон якка тартибдаги уй-жойлар учун мўлжалланган жойдан кўп қаватли турар-жойлар қурилишига рухсат этилмайди, — дейди масъул.
Вазирлик масъулларининг содда қилиб тушунтиришича, Zohmir Group номли қурилиш компаниясига кўп қаватли турар-жой учун пул тўлаганлар алданган.
Вазирликнинг қурилиш ва уй жой коммунал хўжалиги бошқармаси бошлиғи Элёр Комилов фуқароларга мурожаат қилиб, келажакда алданиб қолмаслик учун кўп квартирали уйдан хонадон харид қилишда қурувчилар билан ўртада тузилаётган шартномаларни тўлиқ ўқиб кўришни, керакли ҳолларда ҳуқуқшуносларга мазкур шартномани кўрсатишни, мазкур шартномаларга ўз талаб ва таклифларини ҳам киритишлари лозимлигини айтмоқда.
Фуқароларимиз битмаган уй-жой сотиб олаётганда Қурилиш ва уй-жой коммунал хўжалиги вазирлигининг расмий сайтидан қурувчи ташкилот ҳақида маълумот олишлари кераклигини эслатиб ўтамиз. Фуқаролар сайтдан қурилиши бошланган уй-жойларнинг қурилишга рухсат берувчи ҳужжатлари, шунингдек, лойиҳа ва экспертиза ҳужжатлари билан танишиб чиқиши мумкин. Қолаверса, фуқаролар қурилиш бошаётган қурувчининг 20 фоиз маблағга эга эканлиги, банкдан алоҳида ҳисоб рақам очганлигини кўриб, билиб олишлари мумкин бўлади. Шу сабаб қурувчининг Қурилиш ва уй-жой коммунал хўжалиги вазирлигининг электрон платформасидан рўйхатдан ўтганлигини кўришларини тавсия этамиз, — дейди Элёр Комилов.
Изоҳ (0)