Душанбе шаҳридаги Марказий Осиё давлатлари раҳбарларининг Маслаҳат учрашуви доирасида расмий тадбирлар, концерт ҳамда минтақа мамлакатларида ишлаб чиқарилаётган саноат маҳсулотлари кўргазмаси бўлиб ўтди. Бу ҳақда Президент матбуот хизмати хабар берди.
Унга кўра, Шавкат Мирзиёев, Тожикистон президенти Эмомали Раҳмон, Қозоғистон президенти Қосим-Жўмарт Тўқаев, Қирғизистон президенти Садир Жапаров, Туркманистон президенти Сердар Бердимуҳамедов ҳамда фахрий меҳмон – Озарбайжон президенти Илҳом Алиев Туркман халқининг миллий етакчиси, Туркманистон Халқ Маслаҳати Раиси Гурбангули Бердимуҳамедовни Марказий Осиё давлатлари раҳбарларининг фахрий нишони билан тақдирлаш маросимида иштирок этди.
Фахрий нишон 2021 йилда Марказий Осиё давлатлари раҳбарларининг учинчи Маслаҳат учрашувида таъсис этилган бўлиб, у билан минтақавий ҳамкорликни ривожлантиришга алоҳида ҳисса қўшган шахслар мукофотланади.
Сўнг етакчилар “Кўҳи Борбад” саройида мамлакатлар санъат усталари иштирокидаги “Дўстлик оқшоми” концерт дастурини биргаликда томоша қилдилар. Фолклор-этнографик жамоалар ва эстрада артистларининг чиқишлари, миллий қўшиқ ва рақслар халқлар қардошлиги ва маданий муштараклигининг ёрқин ифодаси бўлди.
Тадбирлар дастури “ЭКСПO Марказий Осиё 2023” кўргазмасига ташриф билан давом этди. У ерда президентларга минтақада ишлаб чиқарилаётган асосий турдаги маҳсулотлар намойиш этилди.
“Made in Uzbekistan” бўлимида мамлакат заргарлик, тўқимачилик, чарм-пойабзал , электротехника, фармацевтика, қурилиш материаллари саноати, ахборот технологиялари, қишлоқ хўжалиги ва туризм тармоқлари салоҳияти акс этган. Кўргазмадан Қозоғистон, Қирғизистон, Тожикистон ва Туркманистон маҳсулотлари ҳам жой олган. Экспозициянинг умумий майдони 1800 квадрат метрдан ортиқ.
Танишув якунида давлат раҳбарлари мутасаддиларга ўзаро товар айирбошлаш ҳажмини ошириш ва саноат кооперациясини кенгайтириш юзасидан аниқ топшириқлар берди.
Изоҳ (0)