Хитойнинг энг йирик суғурта компанияларидан бири — China Life Insurance директорлар кенгашининг собиқ раиси Ван Венбин ўлим жазосига ҳукм қилинди. Тегишли қарор Жинан шаҳри (Шарқий Шандун вилояти) халқ суди томонидан қабул қилинди.
Суғурта компаниясининг партия қўмитасини ҳам бошқарган собиқ амалдор пора олиш, шунингдек, хориждаги мол-мулкни яширишда айбдор деб топилди. Суд қарорида айтилишича, икки йиллик муҳлатдан кейин қонунга мувофиқ ўлим жазоси умрбод қамоқ жазосига алмаштирилади. Ван Венбиннинг барча шахсий мол-мулки ҳам давлатга мусодара қилиниши керак.
Ван Венбин 1997 йилдан 2021 йилгача турли давлат лавозимларида ишлаган. Бу вақт ичида у бевосита ёки учинчи шахслар орқали умумий қиймати 325 миллион юан (45,7 миллион доллар) миқдорида пора олган. Бундан ташқари, у 56,42 миллион юанга яқин (7,9 миллион доллар) пулни ноқонуний равишда чет элда яширгани айтилмоқда.
Изоҳ (0)