Юра Шатунов ҳаёт бўлганида 6 сентябрь куни 50 ёшга тўлган бўларди. У кўп авлодларнинг кумирига айланди, унинг деярли барча қўшиқлари ёд бўлиб кетди. Аммо кўпчилик унинг болалиги оғир ўтганини билмайди.
- Шатунов 1973 йилда туғилган. У дунёга келганда ота-онаси ёш ва балоғатга етмаган эди, шунинг учун улар болани бобоси ва бувиси тарбиясига беришади. Аммо бобоси вафотидан кейин бола яна онасиникига кўчиб ўтади.
- Ўша пайтда ота-онаси аллақачон ажрашган, онаси Вера Шатунова иккинчи турмуш ўртоғи билан яшаётганди. Ўгай отаси Юрани яхши кўрмасди, шунинг учун бола кўпинча кўчада юрар, ҳатто уйдан қочиб кетарди. Ота-она меҳрини ҳис қилмайдиган оилада яшаш унга оғир ботарди.
- Юранинг онаси касал бўлиб, аҳволи йилдан йилга ёмонлашарди. Аёл бутунлай оғирлашиб қолгач, ўғлини мактаб-интернатга беради.
- Онаси Вера Шатунова 29 ёшида вафот этади. Шундан кейин ёш Шатунов бир муддат холаси билан яшайди. Холаси Нина Долгушина халқ қўшиқлари ансамблида қўшиқ куйларди ва болани тез-тез машғулотларга олиб борарди. Юра нота ёзувларини тушунмаса ҳам эшитиш қобилияти кучли эди. У гармошка ёки гитарада ҳеч қандай муаммосиз исталган куйни чала оларди.
- Кейинчалик Шатуновнинг иккинчи холаси уни васийликка олади, аммо оиланинг молиявий аҳволи оғирлиги сабабли бир мунча вақт ўтгач, холаси уни болалар уйига беришга қарор қилади. Бундан хабар топган Юра бошпана берар, деган умидда отасининг олдига боради. Отасининг эса аллақачон бошқа оиласи бор эди ва ўғлини ўзи билан олиб кетишни хоҳламайди. “Ласковий май”нинг бўлажак юлдузи ўзининг васийлиги бўйича комиссия иш очгунга қадар саргардонликда юради.
- Шундан сўнг Юра Оқбулоқ қишлоғидаги меҳрибонлик уйи директори Валентина Тазекенова билан танишади. У Юранинг ҳаётини эшитиб, комиссияни ўсмирни ўз муассасасига берилишига кўндиради. Айнан Валентина Юрага оналик қилади.
- Бир йил ўтгач, аёл Оренбургдаги 2-сонли мактаб-интернатни бошқара бошлайди ва Шатуновни ўзи билан олиб кетади. Айтиш мумкинки, Юранинг ижод йўлидаги илк қадамлари айнан шу ерда бошланган.
- Мактаб-интернатда йигит Вячеслав Пономарев ва Сергей Кузнецов билан танишади, улар Юрани ўз гуруҳида солист бўлишга таклиф қилишади. Афсонавий “Ласковий май” гуруҳи шундай пайдо бўлади. Қўшиқларни Кузнецов ёзади, Пономорев басс чалади, Юра эса куйлайди.
- Жамоа тез орада Оренбургда машҳурликка эришади, улар маҳаллий ёшларнинг кумирларига айланишади. Бир куни қўшиқларининг кассетаси ўша пайтда машҳур бўлган “Мираж” гуруҳи продюсери Андрей Разиннинг қўлига тушади. Разин йигитларнинг катта салоҳиятга эга эканини дарҳол англайди.
- Уларни ўз қаноти остига олади — Юра Шатуновнинг етимлиги эса жамоага янада катта шон-шуҳрат келтиради.
- “Ласковий май” катта муваффақият ҳамда машҳурликка эришади ва Юрий Шатунов аёлларнинг севимлисига айланади. Йигитларнинг сурати туширилган плакатлар тезликда сотиларди, улар Сталлоне ва Жан-Клод ван Дамм суратларидан ҳам қимматроқ эди.
- 1991 йилда мусиқий гуруҳ Америка шаҳарлари бўйлаб гастрол сафарига чиқади. Тез орада Юрий жамоани тарк этиб, яккахон карьерасини давом эттиришга қарор қилади. Етимлиги учун ҳамманинг раҳми келган бечора бола ролини ўйнашдан чарчайди.
- Афсуски, ўша пайтда Юранинг машҳурлиги пасая бошлайди. Мухлислар аллақачон “Ласковий май”нинг хитларини ёддан билар, аммо санъаткорнинг янги қўшиқлари аввалгидек машҳур бўлмаётганди. Машҳурликнинг иккинчи тўлқини 2000 йилларнинг бошларига тўғри келди. Шатунов яна стадионларни тўлдира бошлади, унинг қўшиқлари мухлисларни илиқ носталжи билан қувонтирди.
- Шахсий ҳаётда ҳам Юранинг ишлари жойида эди. У адвокат қиз Светланага уйланади. Эр-хотин икки фарзанднинг ота-онаси бўлишади.
- Юрийнинг якка ўзи ҳам машҳур бўла бошлаши собиқ продюсери Андрей Разин унчалик ҳам ёқмайди. У Шатуновни “Ласковий май” қўшиқларига бўлган муаллифлик ҳуқуқлари учун судга беради. Узоқ давом этган жараёнларидан сўнг Юра судда ютиб чиқади.
- Бу можаро қўшиқчининг соғлиғига таъсир қилса-да, аммо у ижодий фаолиятини давом эттиради. Шатуновнинг иш жадвали жуда тиғиз эди — у тинмай ишларди. 2022 йил 20 июндаги концертидан сўнг хонанда кўкрак қафасидаги оғриқдан шикоят қилади. 22 июнь куни дўстлари билан кечки овқатдан кейин Шатуновнинг аҳволи ёмонлашади. Дўстлари уни касалхонага олиб боришади, аммо қўшиқчи ўша ерда юрак хуружидан вафот этади. “Ласковий май” юлдузи бутун ҳаётини мусиқага бағишлади ва умрининг охиригача саҳнани тарк этмади.
Изоҳ (0)