Донецк вилоятида Road to Relief гуманитар ташкилоти кўнгиллилари Россия томонидан ўққа тутилди, оқибатда икки киши ҳалок бўлди, деб хабар бермоқда ташкилот ўзининг Instagram даги саҳифасида.
Ташкилот маълумотларига кўра, 10 сентябрь куни эрталаб кўнгиллилар Славянскдан чиқиб Бахмут йўналишида ҳаракатланаётган эди. Машинада тўрт киши бўлган.
“Улар Часов Ярдан ўтаётганда, машинасига рус аскарлари ҳужум қилди. Тўғридан тўғри зарба оқибатида машина ағдарилиб, ёниб кетди”, — дейилади ташкилот хабарида.
Ҳодиса оқибатида канадалик кўнгилли Энтони Игнат ва испаниялик кўнгилли, Road to Relief директори Эмма Игуал ҳалок бўлди. Унинг ўлимини Испания ташқи ишлар вазири Хосе Мануэл Альбарес тасдиқлади, деб ёзади El Mundo газетаси.
Бундан ташқари, Германия ва Швециядан келган кўнгиллилар Рубен Мавик ва Йохан Матиас Тир металл парчалари санчилишидан оғир жароҳатлар олган, танаси куйган. Улар ҳозир касалхонада.
Road to Relief фаолияти 2022 йил март ойида бошланган. У фронт чизиғида жойлашган Украина аҳоли пунктларидаги одамларга гуманитар ёрдам кўрсатади ва уларни жанговар ҳудуддан эвакуация қилади.
Изоҳ (0)