Жиноят ишлари бўйича Тошкент шаҳар судида бўлиб ўтаётган “Док-1 Макс” судида сўз олган навбатдаги судланувчиларнинг бири сиропда заҳарли модда борлигини айтиб, жамоатчиликни бундан хабардор қилган самарқандлик шифокорларни, масъулларни суд залига чақиртириш таклифи билан чиқди. Бу ҳақда “Дарё” мухбири хабар берди.
Ўзбекистонда 65 нафар бола ўлимига сабабчи дея қаралаётган “Док-1 Макс” сиропи бўйича бошланган суд мажлиси бир неча кунлик танаффусдан сўнг, 6 сентябрь куни ўз ишини давом эттирди.
Суд мажлисида 21 нафар судланувчиларнинг бири сифатида сўроқ қилинаётган “Дори воситалари тиббий буюмлар ва тиббий техника экспертизаси ва стандартлаштириш давлат маркази” ДУКнинг собиқ масъули С.С. суддаги чиқишида ўзига қўйилган айбловларни тамоман рад этишини маълум қилди.
Менга Жиноят кодексининг 207-моддаси 3-қисми “а” банди (мансабга совуққонлик билан қараш одам ўлишига сабаб бўлса) билан билан айблов қўйилмоқда. Бу айблов асоссиз деб ўйлайман ва шу сабаб бу айбловларга иқрор эмаслигимни, ўзимни оқлаш учун ҳимоячим билан етарли далиллар келтиришга тайёрлигимни маълум қиламан, — деди судда сўз олган судланувчи.
Судланувчи “Дори воситалари, тиббий буюмлар ва тиббий техника экспертизаси ва стандартлаштириш давлат маркази” ДУКдаги фаолияти давомида сидқидилдан ишлаганини, тадбиркорларга тамагирлик, бировнинг ҳаққига хиёнат қилмаганини, ойлик маошини ўзи учун етарли деб билиб, касбига содиқ бўлганини билдирди.
Шунингдек, у суддаги кўрсатмасида Самарқанд шаҳридаги дорихоналардан харид қилинган “Док-1 Макс” таблетка ва сироп дори воситаларини қабул қилган беморларда турли ножўя таъсирлар кузатилганини, бу ҳолат марказга етиб келишдан аввал ушбу вилоятдаги Болалар кўп тармоқли тиббиёт маркази бош врачи томонидан аниқланганини эслатди.
Бу ҳақдаги хат 2022 йилнинг 15 декабрь куни Самарқанд вилоятдаги Болалар кўп тармоқли тиббиёт маркази маъмурияти томонидан вилоят Соғлиқни сақлаш бошқармасига юборилган. Хат мазмунига кўра, “Док-1 Макс” сиропидан заҳарланганлар ва вафот этганлар билан боғлиқ ҳолат шифохона раҳбарияти ва шифокорларига икки ой илгари маълум бўлган.
Улар нега икки ой давомида бу ҳақда Соғлиқни сақлаш вазирлигига хабар беришмаган? Хабар беришган бўлса, нега вазирлик бу ҳақда 2022 йилнинг октябрь ойида масъул ташкилотларга хабар бермади? Мурожаат билан чиқмади? Шу каби саволларга жавоб топиш учун судга Самарқанд вилояти Соғлиқни сақлаш бошқармаси масъулларини ҳам чақиртиришни сўрайман, — дейди судланувчи.
Эслатиб ўтамиз, 2022 йилнинг декабрь ойида ижтимоий тармоқларда Самарқанд шаҳридаги дорихоналардан харид қилинган “Док-1 Макс” сабаб беморларда турли ножўя таъсирлар кузатилаётгани ҳақида хабарлар тарқалди.
Бу ҳақда бошқармасига хат орқали чиқиш қилган Самарқанд вилояти Болалар кўп тармоқли тиббиёт маркази бош врачи охирги икки ойда 21 киши шу дори воситаси қабулидан сўнг шикоят қилгани, 17 нафар боланинг аҳволи ўта оғир бўлиб, уларнинг 15 нафарида ўлим ҳолати кузатилганини маълум қилганди.
Шундан сўнг беморлар аҳволини ўрганиш ва ҳолат сабабларини аниқлаш мақсадида тезкор мутахассислар гуруҳи тузилди. Унинг таркибига агентлик ҳамда Дори воситалари, тиббий буюмлар ва тиббий техника экспертизаси ва стандартлаштириш давлат марказининг малакали мутахассислари киритилди.
Самарқанддаги дорихоналардан харид қилинган Ҳиндистонинг Marion Biotech Pvt. Ltd компаниясига тегишли “Док-1 Макс” таблетка, лимон ва асал таъмли сироп дори воситалари ўрнатилган тартибда экспертизадан ўтказила бошланди. Лаборатория таҳлиллари якунлангач, унинг натижалари ҳақида эълон қилинди. Ушбу дори воситаларининг савдоси 22 декабрдан вақтинча тўхтатилди ва бу ҳақда Quramax Medical МЧЖ томонидан реализация қилинган ташкилотларга хабар юборилганди.
Изоҳ (0)