Саломатлик инсон учун бебаҳо неъмат. У йўқотилганида ҳеч қандай қувонч инсонга татимайди. Айрим ҳолларда касалликлар кишини севимли ишидан воз кечишга ҳам мажбур қилади.
Заҳарланиш
Хонанда Ойхон Эшонхонова оғир хасталикни бошдан ўтказган. У овқатдан заҳарланиш оқибатида узоқ вақт танасидаги токсинлар билан “курашган”. Ҳатто бир неча бор мураккаб жарроҳлик амалиётини ҳам бошдан кечирган.
“Иммунитетим ниҳоятда паст. Шу боис фарзандларим соғлиғимга жиддий эътибор беришади. Кундалик овқатланиш рационим ҳам ҳамиша эътиборда, - дейди хонанда. – Спорт билан мунтазам шуғулланаман ва табиий усулларда иммунитетимни кўтаришга ҳаракат қиламан. Чунки дори-дармондан чарчаганман”.
Ичак чириши
“Киприклари узун қиз” дея катта саҳнага чиққан Азизбек Бекмуродов ҳам оғир дардни бошдан кечирган. 2016 йили тўсатдан тоби қочган хонандада ингичка ичак билан боғлиқ жиддий хасталик аниқланган. Хонанда икки марта жарроҳлик амалиётини бошдан ўтказган. Аммо жароҳат ичак билан боғлиқ бўлгани учун шифокорлар бир муддат қўшиқ куйламасликни тавсия қилишган.
“Ингичка ичагимнинг 2 метри чириш жараёнида экан. Томоғимдан овқат ҳам ўтмай қолди, ойлаб тўшакка михланганимни-ку, тасвирлаб беролмайман”.
Альцгеймер
Ўзбекистонда хизмат кўрсатган артист Жумадулла Раметов бу йил 68 ёшни қаршилайди. Афсуски, актёрда Альцгеймер касаллиги аниқланган. Шу боис у доимий даволанишда.
— Дадам маълум вақт хотирасини йўқотади. Бу вақтда қилган ишларини сизга айтиб бера олмайман. Докторлар ташхис қўйишганига 2 йил бўлди. Касаллик асабдан келди, бошида кўп нарсани унутиб, ҳожатхонани ҳам тополмай қолди, — дейди Азиз Раметов.
Лимфома
Айни дамда АҚШда истиқомат қиладиган актёр Баҳром Матчоновда 2006 йили лимфома касаллиги аниқланган.
— АҚШга келганимда деярли инглиз тилини билмасдим. Хорижда яшаш, одамларига мослашишнинг ўзига яраша қийинчиликлари бор. Орадан тўрт йил ўтиб, менда лимфома хасталиги аниқланди. Жуда тез вазн йўқотдим. Чарчоқ, ҳолсизлик, кўп терлаш, оғриқлар...
Дард қанчалик оғир бўлмасин одам ўзини қўлга олиши, руҳан синмаслиги керак. Бу хасталик билан бир-иккита танишим ҳам даволанган. Шу боис, руҳиятимни чўктирмадим. Америкалик шифокорларга минг раҳмат, гарчи ҳужжатларим бўлмаса-да, ижтимоий ҳимоя ходимларининг ёрдами сабаб, бепул даволандим.
“Мен касалман!” деган фикр мияга ўрнашиб қолса, танадаги оғриқлар янада зўраяди. Шу боис, касаллик аниқланган тақдирда ҳам “Мен соғломман, касаллик мени енголмайди”, деб ўз-ўзини ишонтириш соғайишнинг энг мукаммал давоси ҳисобланади, — дейди актёр интервьюларининг бирида.
Ҳозирги кунда унинг саломатлиги мирмунча яхши ва у ўтган йили Ёлқин Тўйчиев режиссёрлигида суратга олинган “Эврилиш” фильмида суратга тушди.
Жигар саратони
Актриса Раъно Шодиевада жигар саратони касаллиги аниқланган. У узоқ вақтдан буён мунтазам даволанмоқда ва бир нечта жарроҳлик амалиётини ҳам бошдан кечирди.
— Жигаримнинг 60 фоизини олиб ташлашди ва соғломини қолдиришди. Жигар — бу ўсадиган аъзо. Худо хоҳласа, олиб ташланган ўша фоизи бир йил давомида яна ҳам ўсиб, жойига тушади. Осон амалиёт бўлмади, жуда қийин, машаққатли. Жигарнинг ўзи 300 та функцияни бажаради. Унда қон томирлари кўп. Шунинг ҳаммасини жой-жойига тикиб, амалга ошириш керак”, — дейди Раъно Шодиева.
Овоз йўқолиши
“Соҳибқироним” қўшиғи билан мухлислар эътиборига тушган хонанда Ойбек Ҳамроқулов ҳам бир неча йил ижодий танаффус қилган. Бунга овозининг йўқолиши сабаб бўлган. Баъзилар бунга душманчиликлар ҳам сабаб бўлганлигини тахмин қилишади. Ҳозир хонанда кичик тадбирларда иштирок этади, аммо ижодида аввалгидек жўшқинлик сезилмаяпти.
Ошқозон-ичак тизимидаги муаммолар
Сўз устаси Абдулла Акбаров ҳам узоқ вақт саҳналарда кўринмай қолди. Унинг ошқозон-ичак тизимида жиддий касаллик аниқланиб, узоқ вақт даволанди. Ҳозир жисмоний қуввати етганча халқ хизматида бўлишга ҳаракат қилади.
Автоҳалокатдан кейинги жароҳатлар
“Уммон” гуруҳининг собиқ солисти Зоҳид Рисқиев автоҳалокатдан сўнг иккинчи йирик жарроҳлик амалиётини бошдан кечирди. 8 ой аввал унга шифокорлар нафас олишга ёрдам берувчи трубка ўрнатишганди. Саломатлиги анча тиклангач, уни олиб ташлаш амалиёти ўтказилган. Хонанданинг турмуш ўртоғи Камола Ортиқованинг айтишича, Зоҳид фақатгина олти ойдан кейингина қўшиқ куйлай олади.
Асилбек Амануллоҳ
“Бойлама” қўшиғи билан танилган хонанда машҳурлик чўққисига эришган пайтда оғир касалликка чалинганини кўпчилик билмаса керак.
“2007 йилда оғир касалликка чалиндим. Ундан қутилиш учун 3-4 йил вақт кетди. Тиббиётда бу касаллик — “фобияли невроз” деб аталади. Ҳеч нарса ёқмай қолди, одамлар орасига қўшилгим келмай қолди. Хаёлингизга фақат ёмон фикрлар келади. Танишларим сени ўқитворишган, ичингга жин кирган дейишган. Одамлар 3 йил тинимсиз шунақа деяверса бунга ўзингиз ҳам ишониб қолар экансиз. Лекин касаллигимни барибир шифокорлар даволади”, — дейди Асилбек.
Изоҳ (0)