“Ҳудудий электр тармоқлари” АЖ якка тартибдаги тадбиркордан 15 миллион 200 минг сўмга бир дона ёнғоқдан ишланган шахмат харид қилгани ҳақида хабарлар тарқалди. Ташкилот ҳолат юзасидан тушунтириш берди.
Унга кўра, “Ҳудудий электр тармоқлари” АЖ томонидан хорижий экспертлар иштирокида қатор халқаро илмий-техник анжуманлар, нуфузли меҳмонлар ташрифи доирасида тегишли баённома асосида тадбирлар ўтказилиб, мазкур тадбирлар қатнашчилари, нуфузли меҳмон ва хориж экспертларига тарқатма материаллари ва эсдалик совғалари тақдим этилиши белгиланган.
Келтириб ўтилган буюмлар “Э-харид” махсус электрон портали орқали сотиб олиниб, энергетика тармоғига оид халқаро шартномаларни имзолаш тадбирларида нуфузли меҳмонларга совға сифатида топширилган.
“Шуни алоҳида таъкидлаш лозимки, жамият томонидан бу каби эсдалик совғаларни танлашда миллий ҳунармандчилик, халқ бадиий ва амалий санъатини ривожлантириш, соҳа вакилларини ҳар томонлама қўллаб-қувватлаш масалаларига бирламчи ёндашилади”, — дейилади хабарда.
Изоҳ (0)