Янги “Индиана Жонс” ва “Уддалаб бўлмас топшириқ” фильмлари кинокомпанияларга 100 млн долларгача зарар келтириши мумкин

Ёзда намойиш этилган “Индиана Жонс ва тақдир ғилдираги”,  “Уддалаб бўлмас топшириқ-7” фильмлари кинокомпанияларга 100 млн долларгача зарар келтириши мумкин, чунки ушбу кинокартиналар бутун ижара муддати давомида кинотеатрларда етарлича маблағ ишлаб топмаган. Variety нашри маълумотларига кўра, Харрисон Форд ва Том Круз иштирокидаги фильмларнинг ҳар бири 100 миллион доллар йиғади, аммо “Уддалаб бўлмас топшириқ-7” фильми ҳали ҳам ўз бюджетини оқлаш учун жуда кам имкониятга эга.

Иккала фильм ҳам студияларга 300 миллион долларга тушди (маркетинг харажатларини ҳисобга олмаганда), “Индиана Жонс ва тақдир ғилдираги” фильми бутун дунё бўйлаб прокатларда 375 миллион доллар, “Уддалаб бўлмас топшириқ-7” кинокартинаси эса 523 миллион доллар ишлаб топган. Том Круз иштирокидаги фильм 12 июль куни кинотеатрларда намойиш этилди.

Boxoffice Pro нашрининг бош таҳлилчиси Шон Роббинс иккала блокбастер ҳам, агар пандемия даврида яратилмаганида студияларга арзонроққа тушишини, бу эса фильмни яратиш жараёнида бюджетнинг ошишига хизмат қилганини айтган. Бундан ташқари, соҳа мутахассислари иккала фильм ҳам онлайн-кинотеатрларга чиққандан сўнг ўз бюджетларини оқлай олишини таъкидламоқда.

“Индиана Жонс ва тақдир ғилдираги” фильми 29 август куни, “Уддалаб бўлмас топшириқ” лойиҳаси эса 10-октябрь куни рақамли платформаларга чиқарилади.