Шавкат Мирзиёев Ўзбекистон миллий қонунчилиги жаҳон савдо ташкилоти битимларига уйғунлаштирилиши муносабати билан айрим ҳужжатларига ўзгартиришлар киритиш тўғрисидаги фармонни имзолади.
Ҳужжат билан 2024 йил 1 январдан бошлаб алоҳида давлатлардан олиб кириладиган маҳсулотларнинг мувофиқлигини мажбурий баҳолашдан озод этиш тартиби бекор қилинмоқда. Шунингдек, ушбу санадан бошлаб импорт товарларни давлат тилида маркировка қилиш тартибига ўзгартириш киритилади.
Бундан ташқари, 2025 йил 1 январдан бошлаб дори воситаларини ва тиббиёт буюмларини импорт қилишда божхона қийматининг 1,2 фоизи миқдорида божхона расмийлаштируви учун йиғим бекор қилинади. Президент 2024 йилга қадар мазкур йиғим бекор қилиниши муносабати билан тегишли вазифаларни амалга оширишни молиялаштиришнинг муқобил манбалари юзасидан топшириқ берган.
Президент, шунингдек, Вазирлар Маҳкамасига қуйидаги йўналишларда таклифлар киритиш вазифасини юклади:
- 2023 йил 1-октябрга қадар товарларни импорт қилиш учун лицензия бериш жараёнини автоматлаштириш (рақамлаштириш) бўйича;
- 2024 йил 1 январга қадар транспорт харажатларини компенсация қилиш учун субсидия бериш тизимини Жаҳон савдо ташкилоти талабларига мослаштириш.
Июнь бошларида Ўзбекистонда Жаҳон савдо ташкилоти масалалари бўйича махсус вакил лавозими жорий этилганди. ЖСТга аъзо бўлиш жараёнини жадаллаштириш, масъул вазирлик ва идоралар фаолиятининг натижадорлигини таъминлаш бўйича ишларни мувофиқлаштириш махсус вакилнинг асосий вазифаларидан бири ҳисобланади.
Ташкилотга аъзо бўлиш Ўзбекистонга нима беради?
Ўзбекистон ЖСТга аъзо бўлишдан бир неча жиҳатдан фойда кўриши мумкин:
Янги бозорларга чиқиш: ЖСТга аъзо бўлиш орқали Ўзбекистон бутун дунё бўйлаб кенгроқ бозорларга чиқиш имкониятига эга бўлади. Бу экспорт ҳажмини ошириш ва мамлакатда хорижий сармояларни кўпайтиришга ёрдам беради. Натижада иқтисодий ўсиш ошади ва кўпроқ иш ўринлари яратилади.
Яхшиланган савдо қоидалари: Ўзбекистон ЖСТ аъзоси сифатида халқаро савдо қоидалари ва талабларига риоя қилиши талаб қилинади. Бу мамлакатда ишбилармонлик муҳитини яхшилаш, савдо амалиётида шаффофликни ошириш ва коррупцияни камайтиришга ёрдам бериши мумкин.
Интеллектуал мулкни ҳимоя қилиш: ЖСТ интеллектуал мулк ҳуқуқларини ҳимоя қилиш учун асос яратади, бу Ўзбекистоннинг ўсиб бораётган технология ва ижодкорлик саноати учун муҳимдир.
Низоларни ҳал қилиш: ЖСТ халқаро савдо билан боғлиқ низоларни ҳал қилиш учун платформани тақдим этади. Ташкилотга қўшилиш орқали Ўзбекистон бошқа давлатлар билан низоларни адолатли ва холис ҳал этишга ёрдам берувчи механизмдан фойдаланиш имкониятига эга бўлади.
Умуман олганда, ЖСТга аъзо бўлиш Ўзбекистоннинг жаҳон иқтисодиётига тўлиқроқ интеграциялашувига, савдо амалиётини яхшилашга ва иқтисодий ривожланишга ёрдам беради. Бу бўйича музокаралар сўнгги йилларда анча олдинга силжиди.
Иқтисодиёт ва молия вазирлиги, Божхона қўмитаси 2023 йил 1 ноябрга қадар товарларни “экспорт” ва “импорт” божхона режимларига расмийлаштириш учун ундириладиган божхона йиғимлари ставкаларини Жаҳон савдо ташкилоти талабларига мувофиқ бирхиллаштириш бўйича таклифларни Вазирлар Маҳкамасига киритади.
Мазкур фармон 2024 йил 1 январдан, қонунчиликка ўзгартиришлар эса 2025 йил 1 январдан кучга киради.
Изоҳ (0)