Лионель Месси фаолиятидаги совринлар сонини 44 тага етказди ва тарихдаги энг совриндор футболчига айланди

“Интер Майами” Leagues Cup мусобақасининг финалида “Нешвилл” устидан ғалаба қозониб, чемпионга айланди.

“Интер Майами” ҳужумчиси Лионель Месси фаолиятидаги 44-совринига эга чиқди. 

 Sports Illustrated ва яна бир қанча нашрлар хабарига кўра, 36 ёшли футболчи 40 ёшли Дани Алвесни (43 та соврин) ортда қолдирди.

Алвеснинг совринлари сони борасида икки хил статистика мавжуд. Баъзи манбаларда 46 та соврин кўрсатилган, аммо айрим маълумотларда Алвеснинг эришган совринлари 42 та экани қайд этилган.

2001 йилги Баия чемпионлиги ва Нордесте Кубогидаги ғалаба сўроқ остида қолмоқда. Ўшанда Алвес “Баия” сафида ўйнаган. Бундан ташқари 2018 йилги Франция Суперкубоги ҳам ҳисобга киритилмаган, чунки Алвес ўша ўйинда “ПСЖ” қайдномасидан жой олмаган. Шунингдек, Данининг 2003 йилги ёшлар ўртасидаги Жаҳон чемпионатида Бразилия билан чемпионлиги ҳам ҳисобга кирмайди деган тахминлар мавжуд.

Месси “Барселона” сафида 10 марта Ла Лига, 4 марта Чемпионлар Лигаси, 8 марта Испания Суперкубоги, 7 марта мамлакат Кубоги, 3 мартадан клублар ўртасидаги Жаҳон чемпионати ва Европа Суперкубогида зафар қучган. “ПСЖ” билан эса 2 марта Франция чемпионлигига эришган ва бир марта мамлакат Суперкубогида ғолибликни қўлга киритган. .

Аргентина терма жамоаси билан Жаҳон Чемпионлиги, Америка Кубогини қўлга киритган, шунингдек, Олимпиада ва ёшлар ўртасидаги Жаҳон чемпионатида шоҳсупага кўтарилган. Ундан ташқари Финаллиссима чемпионлигини ҳам қўла киритган.