Ҳам даромад, ҳам зиёрат: Ўзбекистонликлар Саудия Арабистонига ишга таклиф этилади

Камбағалликни қисқартириш ва бандлик вазири Беҳзод Мусаев Саудия Арабистони подшоҳлигининг Ўзбекистондаги фавқулодда ва мухтор элчиси билан учрашди.

Унда икки давлат ҳукуматлари ўртасида 2022 йилнинг 17 август куни Жидда шаҳрида имзоланган “Ишчиларни ёллаш соҳасида ҳамкорлик тўғрисида битим”ни самарали амалга ошириш масалалари муҳокама қилинди. 2020—2021 йилларда саудиялик иш берувчилар томонидан ҳаж мавсумида зиёратчиларга хизмат кўрсатиш учун Ўзбекистондан 1000 нафар қассоб ва 500 нафар ҳайдовчиларни жалб қилишга қизиқиш билдирилган. 

4-сентябрдан ўзбекистонлик умра зиёратига борувчилар учун Саудия Арабистони томонидан ҳам янги рейслар амалга оширилади. Бу эса мазкур мамлакатда ишлаш истагида бўлган фуқаролар учун ҳам кенг имкониятлар яратади. 

Учрашувда юқорида қайд этилган битимга мувофиқ, подшоҳлик тарафидан иш берувчиларнинг имкониятлари ва талабларини ўрганиб чиқиш мақсадида Камбағалликни қисқартириш ва бандлик вазирлиги ҳамда унинг тасарруфидаги Меҳнат миграцияси агентлиги масъулларидан иборат техник қўмита тузилиб, тез фурсатда фаолиятини бошлаш борасида келишиб олинди.

Шунингдек, Саудия Арабистони иш берувчилари ва рекрутинг компаниялари вакилларининг Ўзбекистонга ташрифини ташкил этиш мақсадга мувофиқ экани айтилди. Бундан ташқари, Саудия Арабистони подшоҳи Салмон номидаги ёрдам ва инсонпарварлик ишлари маркази томонидан мамлакатимиздаги ижтимоий ҳимояга муҳтож оилалар, боқувчисини йўқотган вояга етмаган болалар, хотин-қизларни қўллаб-қувватлашга йўналтирилган хайрия дастурини ишлаб чиқиш ва амалга ошириш юзасидан музокаралар олиб борилди.