Ўзбекистон автомобиль бозоридаги мавжуд вазиятни баҳолаган Иқтисодий тадқиқотлар ва ислоҳотлар марказига кўра, июнь ойидаги кескин пасайишдан сўнг, автомобиль бозори яна кўтарилди.
Июль ойида автотранспорт воситалари олди-сотдиси бўйича 144,5 мингта шартнома тузилган. Бу ундан аввал ойга нисбатан 17 фоизга, 2022 йилнинг июлига нисбатан эса 40 фоизга кўп. Ушбу ойда сотилган енгил автомобилларнинг умумий сони 20 фоизга ўсиб, 132 мингдан ошган. Энг сезиларли ўсиш Бухоро — 36 фоиз, Сирдарё — 35 фоиз ва Сурхондарё вилоятларида — 31 фоиз қайд этилган.
Бирламчи бозорда янги енгил автомобиллар савдоси 19,2 фоизга ошган. Ўтган йилга нисбатан ўсиш 64,5 фоизни ташкил этган. Бир ой давомида маҳаллий ишлаб чиқарилган 29,6 мингта янги енгил автомобиль сотилган. Бу июнь ойига нисбатан 24 фоиз ва ўтган йилнинг шу даврига нисбатан 59,3 фоиз кўпроқ.
Хорижда ишлаб чиқарилган енгил автомобилларга талаб ундан ҳам ошган. Июль ойи давомида 4,9 мингта хорижда ишлаб чиқарилган янги енгил автомобиллар сотилган. Бу 2022 йил июль ойидаги кўрсаткичдан 2,7 баравар юқори.
Июль ойида енгил автомобилларнинг иккиламчи автомобиль бозори сотувларнинг ўсиши билан ажралиб турди. Ой давомида 97,6 минг дона енгил автомобиллар сотилган бўлиб, бу бир ой олдингига нисбатан 17,6 фоизга кўпдир. Шу билан бирга, 2022 йилнинг июль ойига нисбатан 30 фоизга сезиларли ўсиш қайд этилган.
Июль ойида фуқаролар 2,7 мингта электромобиль сотиб олган бўлиб, бу июнь ойига нисбатан 28,9 фоизга, 2022 йил июль ойига нисбатан 4,7 баравар кўпдир. Энг кўп электромобиллар Тошкент шаҳри (1,9 минг дона), Тошкент (153 дона) ва Хоразм вилоятларида (117 дона) сотилган.
Электромобилларнинг иккиламчи бозори савдонинг пасайиши билан ажралиб турди. Ой давомида 318 дона электромобиль сотилган бўлиб, бир ойда 15,2 фоиз пасайган. Бироқ 2022 йил июль ойига нисбатан 67 фоизга ўсиш кузатилган.
Изоҳ (0)