Ўзбекистондаги мадрасаларга кириш имтиҳонлари қачон ва қайси ҳудудларда ўтказилиши маълум қилинди

Ўзбекистон мусулмонлар идораси тасарруфидаги ўрта махсус ислом таълим муассасаларига ўқишга қабул қилиш бўйича тест синовлари 2023 йил 17 август куни 1 сменада бўлиб ўтади ва соат 09:00 да бошланади. Бу ҳақда идора ахборот хизмати хабар берди.

Маълум қилинишича, талабгорлар тест синови ўтказиладиган ҳудудга шахсини тасдиқловчи ҳужжат ва тест синовида иштирок этиш учун рухсатнома билан 08:00 дан кечикмаган ҳолда келишлари керак.

“Тест синовида иштирок этиш учун рухсатнома олиш тартиби талабгор таълим муассасасига тақдим этган телефон рақамига смс хабар тарзида юборилмоқда (смс хабар келмаган абитуриентлар ҳужжат топширган таълим муассасасига мурожаат қилишлари сўралади)”, — дейилади хабарда.

Абитуриентлар қуйидаги ҳудуд ва биноларда имтиҳон топширади:

• “Муҳаммад ибн Аҳмад ал-Беруний”: Нукус олимпия ва паралимпия спорт турларига тайёрлаш маркази (Нукус шаҳри);
• “Фахриддин ар-Розий”: Билим ва малакаларни баҳолаш агентлигининг Хоразм вилоятидаги биноси (Урганч тумани);
• “Хадичаи Кубро”: “Ўзэкспомарказ” миллий кўргазмалар мажмуаси (Тошкент шаҳри);
• Мир Араб: Билим ва малакаларни баҳолаш агентлигининг Бухоро вилоятидаги биноси (Бухоро тумани);
• “Ҳидоя”: Билим ва малакаларни баҳолаш агентлигининг Наманган вилоятидаги биноси (Давлатобод тумани);
• “Саййид Муҳйиддин махдум”: Андижон олимпия ва паралимпия спорт турларига тайёрлаш маркази манежи 1-бино (Андижон шаҳри);
• “Хожа Бухорий”: Қарши олимпия ва паралимпия спорт турларига тайёрлаш маркази манежи-1 (Қарши шаҳри);
• “Жўйбори Калон”: “Ёшлик” спорт мажмуаси баскетбол 1-спорт зали Semurg‘ спорт мажмуаси (Бухоро шаҳри);
• “Кўкалдош”: “Ўзэкспомарказ” миллий кўргазмалар мажмуаси (Тошкент шаҳри);
• “Имом Термизий”: Спортнинг ўйин турлари ва енгил атлетикага ихтисослаштирилган болалар ва ўсмирлар спорт мактаби (Термиз шаҳри).