Испанияда коронавируснинг омикрон штаммининг янги варианти — EG.5 билан касалланган 120 дан ортиқ одам аниқланди. Бу ҳақда El Periodicо нашри маълум қилди.
Каталония ҳукуматидаги манбаларга кўра, бу ҳудудда 50 дан ортиқ касалланиш ҳолати аниқланган. EG.5 биринчи марта 8 июнь куни минтақада аниқланган. Шифокорлар маълум қилишича, маҳаллий касалхоналарга мурожаат қилаётганлар сонининг кўпайишига коронавируснинг янги тури сабаб бўлиши мумкин.
Испания матбуотининг ёзишича, ҳозирда қиролликда ковид билан касалланиш даражаси ошган. Агар июль ойи бошида ҳар 100 минг аҳолига 29 та ҳолат аниқланган бўлса, ҳозир бу кўрсаткич 90 га яқин. Кўп ҳолларда касаллик енгил кўринишда ўтмоқда.
4 июль куни Испания ҳукумати мамлакатда COVID-19 пандемияси тугаганини эълон қилиб, ниқоб кийиш мажбуриятини бекор қилганди.
Аввалроқ Жаҳон соғлиқни сақлаш ташкилоти (ЖССТ) коронавирус омикрон штаммининг янги EG.5 “Эрис” варианти дунё бўйлаб тез тарқалаётганини маълум қилди. Шу билан бирга, ЖССТ коронавируснинг янги варианти “глобал миқёсда” аҳоли учун катта хавф туғдирмайди, деб ҳисобламоқда.
Изоҳ (0)