Бош вазир Абдулла Арипов Тошкент шаҳрида Aziya Invest Favorit МЧЖ томонидан қурилаётган кўп қаватли уй-жойлардаги хонадонларнинг фуқароларга сотилиши юзасидан келиб чиққан низоли вазият қатнашчилари билан учрашув ўтказаётгани тўғрисида хабар берилганди. Учрашувда жабрланган фуқароларнинг муаммоларини ҳал этиш юзасидан Ҳукумат комиссияси томонидан Бош прокуратура билан ҳамкорликда 2 та ҳолат бўйича қуйидаги таклифлар билдирилди.
.jpg)
Биринчи ҳолат бўйича:
- Амалдаги вазият: Aziya Invest Favorit МЧЖ томонидан 1 106 нафар фуқаро билан умумий майдони 61 минг 766 квадрат метр бўлган хонадонни сотиш бўйича шартномалар имзоланган ва фуқаролар томонидан 163,4 миллиард сўм нақд пул тўланган.
Бугунги кунга қадар 1 106 нафар фуқародан 1 060 нафари Бош прокуратуранинг тергов гуруҳи томонидан жабрланувчи сифатида сўроқ қилиниб, шартнома ва тўлов квитансияларининг ҳаққонийлиги ўрганилган. Қолган 46 нафар фуқаро ҳали терговчиларга келиб учрашмаган (сўроқ қилинмаган). 1 106 нафар фуқародан 321 таси (29 фоиз) шартномада кўрсатилган сумманинг 100 фоизини, 202 нафари (18 фоиз) 70 фоиздан юқори қисмини, 298 нафар (27 фоиз) фуқаро 50 фоиздан – 70 фоизгача қисмини, 228 нафар (21 фоиз) фуқаро 30 фоиздан – 50 фоизгача бўлган қисмини, 51 нафар (5 фоиз) фуқаро 30 фоизгача бўлган қисмини тўлаган. 6 нафар фуқаро умуман пул тўламаган.
Муаммони ҳал қилиш юзасидан таклифлар:
I вариант:
Лойиҳа ишлари – топшириққа мувофиқ муаммони ҳал қилиш учун Бектемир тумани “Ийк ота” массивидан 11,4 гектар бўш ер майдони танланди ва 1-босқичда ушбу ер майдонининг 4,4 гектарига умумий майдони 61 минг 766 квадрат метр бўлган 1 минг 104 хонадонли 16 та 9 ва 12 қаватли темир-бетон қуйма монолит типдаги уйлар қуриш бўйича лойиҳа таклифи тайёрланди.
Инфратузилма билан таъминлаш – қуриладиган уй-жойларнинг таннархини арзонлаштириш мақсадида массивнинг муҳандислик-коммуникация тармоқлари қурилиши ва ободонлаштириш ишларини республика бюджетидан амалга ошириш таклиф этилади.
Шунингдек, массив ҳудудида маҳаллий бюджетдан ажратилаётган 29 миллиард сўм маблағ ҳисобидан 990 ўринли умумтаълим мактаби жорий йилда фойдаланишга топширилади. Бундан ташқари ушбу массивда боғча ҳам қурилади.
Қурилиш ишлари – мазкур ҳудудда кўп қаватли уйларни қуриш учун соҳадаги йирик пудрат ташкилотларининг таклифлари қабул қилинди. Улар орасидан “Ўзшаҳар қурилиш инвест” компанияси, “Янги замон” МЧЖ, Gold step invest МЧЖлар танлаб олинди.
Кўп қаватли уй-жойлар қурилиши лойиҳа-смета ҳужжатларини ишлаб чиқиб, экспертизадан ўтказиш ишлари 2023 йил 1-октябрга қадар якунланади.
Қурилиш ишларини лойиҳа ишлари билан параллел равишда олиб боришга рухсат берилса 2023 йил 10 августдан бошлаб юборилади ва уйлар 2024 йил якунига қадар тўлиқ фойдаланишга топширилади.
Ҳукумат комиссиясига жабрланган фуқароларга қуриб бериладиган уй-жойларнинг 1 метр квадрати нархи 6 миллион сўмдан ошмаслиги топширилди.
Қуриб битказилган уй-жойларни жабрланган фуқароларга тақсимлаш:
- аввалги пудрат ташкилоти билан тузилган шартномага асосан 100 фоиз пулини тўлаган (320 нафар) фуқароларга беғараз берилади;
- шартномага асосан белгиланган маблағнинг бир қисмини тўлаган фуқароларга ҳам уй берилади, лекин шартномадаги хонадон майдонининг тўланмаган қисмига ҳар бир квадрат метр майдон учун қўшимча тарзда тўлов қилишади;
- жабрланувчи фуқаролар томонидан аввалги пудрат ташкилоти билан тузилган инвестиция шартномасига асосан сотиб олинган хонадоннинг умумий квадрат метри ўзгарган тақдирда, унинг ошган қисми бўйича ҳар бир квадрат метрга қурилиш таннархида қўшимча тўлов амалга оширилади.
Пулини қайтариб олиш истагида бўлган фуқароларга тўлаган пул маблағлари тергов-суд жараёнлари якунлангандан кейин пудрат ташкилотининг давлат фойдасига тергов жараёнида хатланган мол-мулкларни сотиш эвазига тушган маблағлар ҳисобидан қайтариб берилади (тергов ва суд жараёнлари муайян вақт олиши мумкин).
II вариант:
Лойиҳа ишлари – “Ийк ота” массивидан 11,6 геткар бўш ер майдонида 2 та босқичда умумий майдони 226 минг квадрат метр бўлган 3 120 хонадонли 34 та 9, 12 ва 16 қаватли темир-бетон қуйма монолит типдаги уйлар қуриш бўйича лойиҳа таклифи тайёрланди.
Инфратузилма объектлари республика бюджетидан қилиб берилади (113 миллиард сўм).
Қурилиш ишлари – “Ўзшаҳар қурилиш инвест” ИК, “Янги замон” МЧЖ, Gold step invest МЧЖ томонидан қурилади. Қуриб битказилган уй-жойларни жабрланган фуқароларга тақсимлаш 1-вариантдаги каби амалга оширилади.
Назорат тизими – уй-жой лойиҳаси ва қурилиш ишларига қурилиш ва коммунал хўжалик вазирининг ўринбосари Даврон Одилов ҳамда қурилиш ишларининг сифатига Қурилиш ва уй-жой коммунал хўжалиги соҳасида назорат инспекцияси раҳбари Козим Тўлаганов масъул бўлади.
Қурилиш ишлари якунига етказилгунга қадар Ҳукумат комиссияси доимий назорат қилади ва муаммоли масалаларни ҳал қилиб боради.
Иккинчи ҳолат бўйича:
Амалдаги вазият: Тошкент шаҳар ҳокимлигининг 2018 йил 2-октябрдаги 1404-сон қарори билан Яшнобод тумани, Иззат кўчаси, 58-уй манзилида жойлашган “Сувсоз” ДУКга қарашли ҳудуддан 5,2 гектар ер майдони 1 120 та хонадонли 8 та 7 қаватли уй-жойлар қуриш учун Aziya Invest Favorit МЧЖга ажратилган.
Бугунги кунда пудрат ташкилоти ажратилган 5,2 гектар ер майдонида 1 минг 513 та хонадонли 8 та 7 қаватли (мансарда билан биргаликда) уй-жойлар қурилиши олиб борилиб, 4 тасида (3, 4, 5, 6-уйлар) қурилиш ишлари якунланиб, фойдаланишга топширилган.
Қолган 4 та уйда (1, 2, 7, 8-уйлар) қурилиши тугалланмасдан қолган. Ҳозирда пудрат ташкилотининг бошқа мол-мулкини сотиш орқали тушган маблағлар ҳисобидан ушбу 4 та уйда қурилиш ишлари давом эттирилмоқда (ўртача 90 фоизга бажарилган).
Юзага келган муаммо:
1 минг 513 та хонадондан 1 минг 409 таси бўйича фуқаролар билан инвестиция шартномалари тузилган бўлиб, атиги 260 та фуқарога кадастр ҳужжатлари расмийлаштириб берилган холос. Қолган 1 минг 162 та хонадон муаммоли бўлиб турибди;
жами 608 та хонадон фуқароларни хабардор қилмасдан пудрат ташкилоти раҳбари Х. Ҳатамов томонидан ўзига тегишли 17 та тадбиркорлик субъектига 8 та банкдан турли мақсадларда ажратилган 211 млрд сўм кредит маблағлари учун гаров таъминоти сифатида қўйиб юборилган.
- Шундан, 122 та хонадон банк балансига олинган, 112 та хонадон банк балансига олиниб сотиб юборилган, қолган 374 та хонадон банкда гаровда турибди;
- 133 та хонадон 2 та шахс (якка тадбиркорлар ва фуқаролар) номига шартнома берилиб, сотиб юборилган;
- 72 та хонадон солиқ органларида тақиқда бўлгани учун кадастр расмийлаштирилмаган;
- 459 та хонадонда қурилиш ишлари якунига етказилмаган.
Бундан олдин Aziya Invest Favorit МЧЖнинг 34 фоизига эгалик қилган Хайрулла Ҳатамовга нисбатан уй қамоғи эҳтиёт чораси қўлланилгани тўғрисида хабар берилганди. Унга ва оила аъзоларига тегишли бўлган 200 миллиард сўмлик мулклари хатланган.
Изоҳ (0)