Москва нега дрон ҳужуми пайтида сиреналарни ёқмайди? Эксперт тушунтирди 

Украина келажак институти директори Вадим Денисенко нега Москва дронлар ҳужумига қарамай, ҳаво ҳужуми тревогасини ёқмаётганини тушунтирди. 

Мутахассисга кўра, Москвада, Россиянинг бошқа баъзи ҳудудларида ва вақтинча босиб олинган Қримда сиреналар принципиал равишда ёқилмайди. 

“Оммавий ўлим ҳолатлари тарихи бўлмаса, улар сиреналарни ишга туширмайди”, — дейди у.

Денисенко Россия расмийлари “уруш йўқлигини кўрсатиш учун” қўлидан келган барча ишни қилишда давом этишини айтди. Мутахассис яқин келажакда ҳаво ҳужуми сигнали ёқилмаслигини таъкидлади. У бу ҳолат “қандайдир оммавийлик” пайдо бўлмагунча давом этишини билдирди.

Москвага дронлар ҳужуми: вазият қандай?

1 августга ўтар кечаси Москвага яна дронлар ҳужум қилди. Улардан иккитаси шаҳарга яқинлашганида ҳаво мудофааси томонидан уриб туширилди. Учинчиси аввалги ҳужумда шикастланган “Москва Сити” бизнес марказидаги бинога келиб урилди.

Аввалги ҳужум 30 июлга ўтар кечаси юз берганди. Жумладан, Москвага учта дрон учирилган, иккитаси “Москва Сити” бизнес марказидаги биноларга келиб тушган. Дронларнинг яна бири Москва вилоятининг Одинсово туманида уриб туширилгани айтилган.

Бундан ташқари, 24 июль куни ҳам дрон ҳужуми бўлганди. Ўшанда Москвадаги нотурар жой бинолар зарар кўрган. Улардан бири Россия Мудофаа вазирлиги яқинида қулаган.

Май ойи охири ва июль бошида эса дронлар Россия пойтахтига яқинлашганда уриб туширилган. БМТ сўнгги дрон ҳужумини қоралаб, фуқаролик объектларига ҳужум қилмасликка чақирган.