Қирғизистон президенти Садир Жапаров мамлакатнинг поссовет давридаги тараққиётини акс эттирувчи китоб чиқарди.
“24.kg” ахборот агентлигининг ёзишича, “Янги Қирғизистонни қуриш йўли” китоби тўрт қисмдан иборат. Биринчи қисм мамлакатни янгилаш ғоясининг туғилишига бағишланган бўлса, иккинчи қисмда республиканинг асосий ғоявий йўналишлари, учинчи қисмда халқнинг миллий урф-одатлари, хусусиятлари ва маданияти тавсифланади, тўртинчи қисмда эса тараққиёт йўли сарҳисоб қилинади.
Китоб қирғиз тилида 41 минг нусхада чоп этилиб, вилоят кутубхоналари ва Қирғизистондаги турли муассасаларга жўнатилган.
“Жани Қиргизистанди куруунун багити” Садир Жапаров муаллифлигида чоп этилган иккинчи китоб бўлди. Биринчиси 2015 йилда чиқарилган “Сиёсатда 10 йил” номли китоб эди. Унда 2005 йилдан бери Қирғизистонда содир бўлган асосий сиёсий воқеалар тасвирланган. Хусусан, китобда мамлакатнинг биринчи президенти Асқар Акаевнинг қочиб кетиши, Қурманбек Бакиевнинг ҳокимиятга келиши, Феликс Қулов билан тандем ташкил этилгани, Садир Жапаровнинг Коррупцияга қарши кураш агентлигидаги фаолияти, мухолифатнинг норозилик намойишлари ва бошқа воқеалар ҳақида батафсил ҳикоя қилинади.
Аввалроқ Туркманистон собиқ президент, амалдаги Халқ кенгаши раиси Гурбангули Бердимуҳамедовнинг “Ҳаётим мазмунини давом эттириш” номли янги китоби чиқарилган эди. Гурбангули Бердимуҳамедов турли мавзуларда ёзилган камида 50 та китоб муаллифи.
Изоҳ (0)