Сирдарёда беш гектар ерни 40 минг долларга сотмоқчи бўлган опа-ука қўлга олинди

Сирдарёда беш гектар ер майдонини 40 минг долларга сотишга уринган опа-ука қўлга олинди. Бу ҳақда “Замон” информацион дастурида маълум қилинди.

Қайд этилишича, опа-ука ўзаро тил бириктириб, Сайҳунобод тумани ҳудудидаги дарё бўйича тош-шағал қазиб олишга мўлжалланган беш гектар ерни 40 минг АҚШ долларига сотишга уринган. Аниқланишича, ушбу ер майдони уларга фойдаланиш учун ажратилиб, кейинчалик вилояти ҳокимининг тегишли қарори билан бекор қилинган.

Опа-ука ер ўзларига тегишли эканини айтиб, келишилган пулдан 20 минг долларини олган вақтида ашёвий далиллар билан ушланган. Опа карер ҳужжатларини ФВВ ва Экологиядаги танишлари орқали расмийлаштириб беришни ваъда қилган, бироқ судда бундай танишлари йўқлигини билдирган.

Судланувчилар Жиноят кодексининг тегишли моддалари билан айбдор деб топилди — ука 5 йил 6 ой муддатга озодликдан маҳрум этилди. Опасига эса 5 йил муддатга озодликни чеклаш жазоси тайинланди. Шунингдек, у БҲМнинг 210 баробари миқдорида (63 миллион сўм) жарима тўлайди.

Ноқонуний ер савдолари

Апрель бошларида Навоийда 80 гектар ерни 1 миллиард сўмга сотишга уринган шахслар қўлга олингани, Самарқанд ва Фарғонада ноқонуний ер сотиш ҳолатларига чек қўйилгани тўғрисида хабар берилганди. Шунингдек, Қорақалпоғистон Республикаси ва Бухоро вилоятида ер майдонлари савдоси билан боғлиқ фирибгарлик ҳолатлари фош этилганди.