Олмаотадаги кўп қаватли уйда ёнғин: она болаларини деразадан улоқтирди (видео)

Қозоғистоннинг Олмаота шаҳридаги 16 қаватли уйда ёнғин чиқди, бинодагилар деразадан болаларни ташламоқда. Бу ҳақда Tengrinews хабар берди.

Ижтимоий тармоқларда Аккент микрорайонидаги ёнғин акс этган кадрлар пайдо бўлди. Кадрларда онанинг навбатма-навбат болаларини деразадан улоқтиргани, кейин эса ўзи ҳам сакрагани акс этган. Пастдаги эркаклар эса уларни матрас ёрдамида қутқариб қолган.

Фавқулодда вазиятлар бошқармаси хабар беришича, 1 август куни соат 17:10 да (Тошкент вақти билан 18:10) ФВВ куч ва воситалари ёнғинни ўчиришга жалб қилинган. 16 қаватли турар жой биносининг 5-қаватида жойлашган хонадон очиқ аланга билан ёнаётгани аниқланган.

Кўп қаватли уйнинг 5–6-қаватлари даражасида лифт шахтасида электр кабели ёниб кетган. Маҳаллий вақт билан соат 18:00 ҳолатига кўра, ёнғинни ўчириш давом этмоқда. Ёнғин содир бўлган ҳудуд аниқланмоқда.

“Ўт ўчирувчилар юқори қаватдагиларни эвакуация қилмоқда. 300 га яқин одам қутқариб олинган. Ёнғинни ўчириш давом этмоқда. 50 нафар шахсий таркиб ва 14 та техника, жумладан, 3 та автонарвон жалб қилинган”, — дейилади ФВВ хабарида.