Тайфун сабабли Японияда 264 та рейс бекор қилинди

Японияда “Канун” тўфони мамлакат жанубига яқинлашиши сабабли душанба ва сешанба кунларидаги камида 264 та рейс бекор қилинди, деб хабар берди NHK.

Тўфон жануби-шарқдан Япониянинг Окинава префектураси ороллари ва Кагосима префектурасининг Амами архипелагига қараб ҳаракатланмоқда. Сешанба ва чоршанба кунлари шиддатли шамол оролларга етиб бориши кутилмоқда.

Тайфун яқинлашаётгани сабабли JAL (Japan Airlines Corporation) душанба куни Окинава ва Кагосима префектураларида 67 та рейсни бекор қилди. ANA (All Nippon Airways) компанияси душанба куни ушбу йўналишдаги 73 та рейсни ва сешанба куни яна 124 та рейсни бекор қилганини эълон қилди.

Кун давомида бекор қилинган рейслар сони ортиши кутилмоқда.

Ҳозирда “Канун” тўфони марказий босими 960 гектопаскал, шамол тезлиги эса сониясига 40 метр сифатида баҳоланмоқда.

Япония метеорология агентлиги душанба куни кечқурун “Канун” 945 гектопаскал босимли кучли тайфунга айланишини прогноз қилмоқда. Шамол тезлиги сониясига 45 метр тезликка етиши кутилмоқда.