Қирғизистон қишда электр энергияси импортини тўхтатиб, Покистон ва Афғонистонга электр энергиясини фаол экспорт қилувчи давлатга айланишни режалаштирмоқда. Бу ҳақда Қирғизистон раҳбари Садир Жапаров “Кабар” агентлигига берган интервьюсида айтиб ўтди.
Қирғизистон президенти мамлакат кўпроқ қишда электр энергияси тақчиллигига дуч келганини таъкидлади. Бу эса электр энергиясини бошқа давлатлардан бир киловатт-соати учун 3 сомдан харид қилишга олиб келди.
“Биз қишда электр энергияси импортидан бутунлай воз кечмоқчимиз. Жорий йил охирига қадар қурилиши давом этаётган янги ГЭСлар фойдаланишга топширилади. Мақсадимиз келажакда электр энергияси экспорт қилувчи давлатга айланиш. Келгуси йилда биз CASА-1000 линияси орқали Покистон ва Афғонистонга экспорт қилишни режалаштирмоқдамиз”, — деди Жапаров.
Қирғизистоннинг Жаҳон банки олдидаги мажбуриятлари мамлакатни гидроэлектр станцияларини қуриш суръатларини тезлаштиришга ундади. Мамлакат йирик сув ресурсларига эга бўлса-да, кўпинча энергетик инқирозларга дуч келади.
Тўқтўғул сув омборида сув сатҳининг кескин пастлиги, “режали” ўчиришлар, қўшнилардан электр энергияси сотиб олиш одатий ҳолга айланганди.
Мамлакатда электр энергияси тақчиллиги сабабли энергетика соҳасида 2026 йилгача фавқулодда ҳолат режими жорий этилди.
Изоҳ (0)