Шавкат Мирзиёев боғча болаларига маъруза ўқиган инспекторларни танқид қилди

Шавкат Мирзиёев ИИВ кенгайтирилган ҳайъат йиғилишида боғча болаларига маъруза ўқиган инспекторларни танқид қилди.

“Нима иш қилиш кераклигини билмаган айрим профилактика инспекторлари эса боғчаларга бориб, 3-4 ёшли болакайларга “оқ-қорани фарқлаш” бўйича маъруза ўқиш билан банд. Тизимда стажи 3 йилгача бўлган, энди тажриба тўплаётган профилактика инспекторларини криминоген оғир маҳаллага қўйиш амалиёти ҳалигача давом этмоқда. Аксинча, “яхши” маҳаллаларда эса кўп йиллик тажрибаси бор ходимлар хизмат қилмоқда”,  — деди президент.

Шавкат Мирзиёев тилга олган ҳолат Тошкентнинг Учтепа туманидаги боғчалардан бирида содир бўлганди. Профилактика инспекторлари боғча тарбияланувчиларига “Нима оқ, нима қора? Қайси ишни қилсам тўғри бўлади, қайси ишни қилсам қандай бўлади? Қилишдан аввал бу ишни қилганимдан кейин эртага нима бўлади, шуни ўйлаш керак”, — дея тарбиявий соат ўтган, ҳолат акс этган видео ижтимоий тармоқларда тарқалганди.

Давлат раҳбари ижтимоий-иқтисодий муаммоси ҳал этилмаса жиноят йўлига кириш эҳтимоли юқори аҳоли қатлами билан янгича ишлаш тизими жорий қилинганини, бундай тоифага кирувчи аҳоли “ижтимоий профилактика” тамойили асосида “маҳалла бешлиги”га номма-ном бириктирилганини айтиб ўтди.

“Лекин Ички ишлар, Камбағалликни қисқартириш вазирликлари, Оила ва хотин-қизлар қўмитаси бу масаланинг ичига чуқур кирмаган, “маҳалла бешлиги” учун на бир методика, на бир қўлланма ишлаб чиққан. Оқибатда ушбу янги тизим 9 минг 400 та маҳалладан бор-йўғи 20 тасида ишлаяпти”, — деди президент.

Ички ишлар вазирига кадрларни танлаш ва жой-жойига қўйиш ишлари қониқарсиз йўлга қўйилгани кўрсатиб ўтилди.