Андижон вилоятида фуқаро И.Ш.нинг АТ “Халқ банки”да ишлаган даврида 3,8 миллиард сўм маблағни ўзлаштириш йўли билан талон-торож қилганлиги аниқланган. Бу ҳақда Андижон вилояти Прокуратураси “Дарё”га маълум қилди.
Айтилишича, Андижон вилоят прокуратураси томонидан фуқаро И.Ш. ва бошқаларга нисбатан Жиноят Кодексининг 167-моддаси 3-қисми “а” банди (айбдорга ишониб топширилган ёки унинг ихтиёрида бўлган ўзганинг мулкини жуда кўп миқдорда ўзлаштириш ёки растрата қилиш йўли билан талон-торож қилиш — базавий ҳисоблаш миқдорининг уч юз бараваридан олти юз бараваригача миқдорда жарима ёки уч йилгача ахлоқ тузатиш ишлари ёхуд беш йилдан ўн йилгача озодликдан маҳрум қилиш билан жазоланади) ва бошқа моддалари билан қўзғатилган жиноят иши бўйича тергов ҳаракатлари олиб борилган.
Терговда фуқаро И.Ш. АТ “Халқ банки” вилоят Куйганёр филиали ва АТ “Халқ банки” вилоят амалиёт бўлими бошлиғи лавозимларида ишлаб келган даврида 3,8 миллиард сўмлик пул маблағини ўзлаштириш йўли билан талон-торож қилганлиги аниқланган.
Фуқаро И.Ш. талон-торож қилинган 3,8 миллиард сўм маблағлардан 1,3 миллиард сўмини қопламаганлиги, терговга узрли сабабларсиз келмай яшириниб юрганлиги сабабли 2022 йилнинг май ойида унга нисбатан юқоридаги моддалар билан сиртдан айблов эълон қилиниб, “қамоққа олиш” тарзидаги эҳтиёт чораси тайинланган. У қидирувга берилган.
Айни вақтда иш Жиноят процесcуал кодексининг 364-моддаси 1-қисми 2-бандига (айбланувчининг қаерда эканлиги номаълум бўлган) асосан ҳаракатдан тўхтатилган.
Изоҳ (0)