ОТМларнинг бакалавриат таълим йўналишларига кириш тест синовларида иштирок этиши белгиланган абитуриентлар сони 948 486 нафарни ташкил этди. Бу ҳақда Билим ва малакаларни баҳолаш агентлиги хабар берди.
2023/2024-ўқув йили учун ОТМларнинг бакалавриат таълим йўналишлари учун рўйхатдан ўтган абитуриентлар сони 1 018 007 нафарни ташкил этганди. Аввалги йилларда таълим муассасаларини тугатган абитуриентлар тест синовида иштирок этиш учун 165 минг сўм тўлов қилиши кераклиги белгиланган. Тўлов қилмаганлар рўйхатдан ўтмаган ҳисобланади ва тестга киритилмайди. 69 521 нафар абитуриент тестга кириш учун тўловни амалга оширмагани учун рўйхатдан ўтмаган деб топилган бўлиши мумкин.
2022/2023-ўқув йилида онлайн рўйхатдан ўтган абитуриентлар сони 1 214 232 нафарни ташкил этганди. Уларнинг 1 146 744 нафари тест синовларида иштирок этиши белгиланганди.
Аввалги ўқув йили билан таққосланса, бу йил кириш тест синовларида иштирок этиши белгиланган абитуриентлар сони салкам 200 минг нафарга кам бўлди.
2023/2024-ўқув йили учун абитуриентларнинг таълим тили бўйича тақсимоти:
- ўзбек тили — 828 699 нафар;
- рус тили — 88 830 нафар;
- қорақалпоқ тили — 28 718 нафар;
- бошқа тиллар — 2 239 нафар.
Таълим шакллари бўйича тақсимоти (биринчи таълим йўналишига нисбатан):
- кундузги таълим шакли — 545 616 нафар;
- кечки таълим шакли — 22 867 нафар;
- сиртқи таълим шакли — 373 169 нафар;
- масофавий таълим шакли — 6 834 нафар.
Энг кўп абитуриент рўйхатдан ўтган ОТМлар (биринчи таълим йўналишига нисбатан):
- Ўзбекистон миллий университети — 33 721 нафар;
- Тошкент давлат транспорт университети — 28 474 нафар;
- Фарғона давлат университети — 28 188 нафар;
- Тошкент давлат педагогика университети — 26 827 нафар;
- Қарши давлат университети — 26 640 нафар.
Энг кўп абитуриент рўйхатдан ўтган ҳудудлар (доимий яшаш ҳудуди бўйича):
- Қашқадарё вилояти — 112 242 нафар;
- Самарқанд вилояти — 105 805 нафар;
- Фарғона вилояти — 89 022 нафар;
- Тошкент вилояти — 82 173 нафар;
- Сурхондарё вилояти — 79 004 нафар.
Изоҳ (0)