Ўзбекистон футбол ассоциацияси бир қатор солиқлардан озод этилади, деб хабар бермоқда Telegram’даги “Ҳуқуқий ахборот” канали.
Маълум қилинишича, президент томонидан 18 июль куни имзоланган қонун билан Солиқ кодексининг 483-моддасига қўшимча киритилди.
Шунга кўра, 2026 йил 1 январгача Ўзбекистон футбол ассоциацияси, унинг ҳудудий бўлинмалари, “Ўзбекистон Профессионал футбол лигаси” жамоат бирлашмаси, Ўзбекистон футбол ҳакамлари маркази ва профессионал футбол клублари қуйидаги солиқларни тўлашдан озод этилади:
- барча турдаги солиқлари (бундан ижтимоий солиқ мустасно);
- ўзи жалб қилган чет эл мутахассислари ва футболчиларининг даромадларидан тўланадиган жисмоний шахслардан олинадиган даромад солиғи;
- Ўзбекистонга олиб кириладиган, Ўзбекистонда ўхшаши ишлаб чиқарилмайдиган спорт асбоб-ускуналари ва инвентари, трансляция қилиш учун зарур бўлган асбоб-ускуналар, инвентар ва техника, фармакология товарлари, спорт озиқ-овқатлари, футбол (футзал) майдонлари учун сунъий ўтлар, шокпад, гранулалар, махсус елимлар ва махсус профессионал спорт кийим-бошлари, транспорт воситалари, шу жумладан махсус транспорт воситалари учун қўшилган қиймат солиғи.
Қонун расмий эълон қилинган кундан эътиборан кучга киради.
Эслатиб ўтамиз, Шавкат Мирзиёев 6 апрель куни ёшлар сиёсати ва спортни ривожлантириш бўйича таклифлар тақдимоти билан танишганда Ўзбекистон футболини ривожлантириш масаласига алоҳида тўхталиб ўтилганди.
2 июль куни Сенатнинг қирқ биринчи ялпи мажлисида бугунги кунда иқтидорли ёш футболчиларни саралаб олиш тизими ва футбол инфратузилмасини янада ривожлантириш, соҳада маркетинг ва замонавий бошқарув механизмларидан самарали фойдаланиш мақсадида амалдаги солиқ имтиёзларининг амал қилиш муддатини узайтириш зарурати мавжудлиги қайд этилганди.
Изоҳ (0)