Болаларнинг тишини эрта даврларданоқ тўғри парвариш қилиш, брикет, пластинка мосламасини тақиш ҳамда кариес касаллигининг эрта ривожланиши бир-бирига боғлиқ. Бунинг сабабларини тиш шифокори Ҳусниддин Ғуломиддинов тушунтириб берди.
Ёш болаларда тиш чиқиш вақти 5-6 ойлик давридан бошланади. Сут тишларининг чиқиш вақти турлича. Масалан, қайсидир болада 1 ёшгача умуман тиш чиқмаслиги, бошқа бир болада эса чақалоқликнинг илк давридаёқ тиш куртаклари ёриб чиқиш ҳолатлари кузатилади. 6-7 ёшдан бошлаб сут тишлари тушиб, улар ўрнига доимий тишлар чиқишни бошлайди.
Шу ўринда таъкидлаш керак, айрим ота-оналарнинг бефарқлиги ёки овқатланиш ратционида шакар миқдорининг кўплиги сабабидан болаларда сут тишларининг муддатидан олдин касалланиб, чириб тушиб кетиши ортиб бормоқда. Вақтидан олдин тишларнинг тўкилиши боланинг маълум бир муддат тўлиқсиз тишлар билан овқатни чайнашга, шунингдек, кейинчалик бошқа тишларнинг нотўғри чиқишига олиб келади. Бу эса янада жиддий муаммоларга — боланинг брикет ёки пластинка тақишига сабаб бўлади. Шу сабабдан тиш чиқиш вақтида профилактика учун стоматолог кўригидан ўтиш ва тишни тўғри парвариш қилишни гарчи бола истамаган тақдирда ҳам дейлик онанинг ўзи турли ўйинлар шаклида одат тусига айлантириши зарур.
Қайси ҳолатда тишларга брикет қўйилади?
Брикет мосламаси озиқ-овқатни тишлаш ва чайнаш муаммоларини бартараф этиш учун асосан 14 ёшдан катталарга қўйилади. 14 ёшгача бўлган даврда жағ суяклари ҳали қотмаган, ўсаётган бўлади. Бундай пайтда болаларда пластинка ёрдамида муаммони ҳал қилса бўлади.
Брикет таққандан сўнг эътибор бериш керак бўлган муҳим жиҳат — гигиенадир. Кўпчилик бу мосламани қўйдиргандан сўнг шу билан тишлар тўғриланиб кетади деган фикрда бўлади. Агар брикет қўйилган тишлар қоидалар бўйича тозаланмаса, кариес касаллиги жуда тез ривожланади.
Шунингдек, ақл тишларининг аҳамияти, уларни қай ҳолларда олдириб ташлаш кераклиги ҳамда тиш “пломба”ларининг энг яхши тури қайси эканини қуйидаги видеосуҳбатни кўриш орқали билиб олинг.
Изоҳ (0)