Жуҳи Чавла машҳур кино актрисаси бўлган биринчи ҳинд моделларидан бири ҳисобланади. У 1967 йилнинг 13 ноябрь санасида Ҳаряна штатининг Амбала шаҳрида туғилган. Унинг отаси Ҳиндистон солиқ хизмати ходими бўлган, онаси эса “Оберой” меҳмонхоналар тармоғида ишлаган. Оилада Жуҳидан ташқари яна икки нафар фарзанд: унинг акаси Санжив Чавла ва синглиси Сония тарбияланган.
1984 йилда Жуҳи “Ҳиндистон гўзали” танловида ғолибликни қўлга киритди ва АҚШнинг Майами шаҳрида бўлиб ўтган “Коинот гўзали” танловида ўз мамлакати номини ҳимоя қилди. У танловда энг яхши 10 та ярим финалчилар қаторига кира олмади, бироқ бари бир “Энг яхши миллий либос” номинацияси бўйича мукофотни қўлга киритиб, ҳиндларнинг фахрига айланди.
Гўзаллик маликаси ўзининг актёрлик дебютини катта бюджетли “Султоннинг мулки” (1986 йилда намойиш этилган) фильмида қилди, бу фильм кассада муваффақиятсизликка учради. Бироқ актриса ўша йили муваффақиятли “Баҳодиршоҳ Зафар” сериалида суратга тушди.
Унинг кино оламидаги биринчи муваффақиятли лойиҳаси икки тилда: каннада ва тамил тилларида суратга олинган “Севги дунёси” (1987 йилда тақдим этилган) романтик мусиқий фильми бўлди. Кейинчалик Жуҳи Болливуд юлдузи Амир Хон билан биргаликда “Ҳукм” (1988 йилда суратга олинган) фильмида суратга тушди. Болливуднинг энг машҳур лойиҳаларидан бирига айланган фильмга йигирма йиллик жангари фильмлар ҳукмронлигидан сўнг кинога романтикани қайтарган кинокартина деб қаралади.
Шридеви ва Мадҳури Дикшит билан бир қаторда, Жуҳи 1980 йилларнинг охири ва 1990 йилларнинг бошларида ҳинд киносининг энг яхши учта актрисасидан бири эди. У карьерасининг бошида талабгир ҳинд актрисаларидан бири эди, 1990 йилдан 1993 йилгача унинг иштирокидаги 29 та фильм экранларга чиқди.
Унинг талабгир актрисалардан бири бўлиши бир нечта яхши лойиҳалардан, жумладан, ўн йилликнинг иккита энг катта блокбастерларидан — “Ража Ҳиндустани” (1996 йил) ва “Девона қалб” (1997 йил) фильмларидаги ролидан воз кечишига сабаб бўлган. Иккала фильмдаги ролларни ҳам Каришма Капур ижро этган ва катта муваффақиятга эришган. Жуҳи ҳалигача бу фильмлардаги роллардан воз кечганини ўзининг карьерасидаги энг катта хатоси деб билади.
У “Ишқ” мелодрамасидаги роли учун “Энг яхши актриса” номинациясида Filmfare мукофотини қўлга киритди. Бундан ташқари “Ҳукм” фильмидаги энг яхши дебют учун яна бир бор ушбу мукофотни олишга муваффақ бўлди.
Режиссёр Ракеш Рошан “Васваса” фильмини суратга олиш чоғида Жуҳини ўзининг энг яқин дўсти, миллионер Жай Меҳта билан таништирди. Фильм 8 йил давомида экранларга чиқмади, бироқ у Жуҳига бўлажак турмуш ўртоғи билан учрашиш имконини берди.
Журналистлар актрисанинг ҳамкасблари Шоҳрух Хон ва Амир билан яқин муносабатда бўлгани ҳақида ёзган, у эса ҳар доим бу миш-мишлардан узоқроқ туришга ҳаракат қилган. Жуҳи 1995 йилда турмушга чиққан. Актриса шахсий ҳаёти ҳақидаги маълумотларни сир сақлашга ҳаракат қилган, кўплаб мухлислар унинг оилавий аҳволи ҳақида ҳомиладор бўлганида билган. Кўпчилик Меҳтани кўриб, актрисанинг севги учун эмас, балки пул учун унга турмушга чиққанини айтган, чунки Жай Ҳиндистондаги энг бой инсонлардан бири ва унинг ҳисобларида миллионлаб долларлар бор эди.
2001 йилда Жуҳи Чавла қизи Жавнини, икки йилдан сўнг ўғли Аржунни дунёга келтирди. Шундан кейин Жуҳи кино оламидаги ишини сезиларли даражада қисқартирди ва ўзини оиласига бағишлади. Актрисаликдан ташқари, у ўзининг “Натҳ вилласидаги арвоҳ” фильмида биринчи марта қўшиқ куйлади.
2014 йилда актриса Стивен Спилбергнинг Хелен Миррен ва Ом Пури иштирокидаги “Зираворлар ва эҳтирослар” фильмидаги кичик рол билан Голливудда дебют қилди.
55 ёшли актриса барча қариндошларидан: ота-онаси, синглиси ва акасидан айрилган. Шунинг учун ҳам у оиласи билан бирга яшайди, турмуш ўртоғи ва болалари билан ўтказган ҳар бир лаҳзани қадрлайди.
Изоҳ (0)