Туркия сериаллари экспорт бўйича АҚШдан кейин дунёда иккинчи ўринда туради ва унинг маҳсулотларини бутун дунё бўйлаб 650 миллион киши томоша қилади. Биз энг машҳур лойиҳаларнинг номини биламиз, сериалларда рол ижро этган актёрлар ва улар иштирокидаги премьераларни интиқлик билан кутамиз. Бироқ баъзан севимли сериалларимиздаги эпизодлар сони ва давомийлиги меъёридан ошиб кетади ва уларни кўриш учун ҳар доим ҳам вақт бўлмайди. Аммо ўқиш ва машғулотлар тугади, ёзги таътил қизғин паллада. The Voice нашри бўш вақтингизни мароқли ўтказишга ёрдам берадиган бешта ко ъп қисмли турк сериаллари ҳақида маълумот берди.
“Афсона”
Сюжетда бош қаҳрамон Оққиз кўп йиллар олдин оила аъзоларидан айрилган — унинг яқинларини маккор Алпагутхон ўлдирган. Кунлардан бир кун Оққиз ундан қасос олишга қасам ичади. У ўзини ҳимоя қилиш учун тезроқ вояга етиши ва душманларига қарши туришни ўрганиши керак эди. Кейинчалик енгилмас бош қаҳрамон хоннинг мол-мулкини ўғирлаб, камбағалларга беради ва халқ уни ўз ҳимоячиси сифатида кўради. Қасос олиш вақти келганда, тақдир Оққизнинг режаларига аралашади — у Хоннинг ўғли Батуғ билан учрашади ва жуфтлик ўртасида ҳақиқий ҳис-туйғулар пайдо бўлади.
“Оила учун”
Шуҳратпараст, ишбилармон Акиф уй бекаси билан келишмовчиликларга дуч келади. У жанжални бостирмоқчи бўлади, бироқ бу воқеаларнинг охири нима билан тугашини тахмин қилмайди. Акифнинг айби билан тўрт нафар бола етим қолади. Ишсиз йигит Қодир, ўрта мактабда ўқиётган эгизаклар Асие ва Ўмер, ҳатто ёш Эмел ҳам ўзларига ва бир-бирларига ғамхўрлик қилишни ўрганади. Молиявий муаммолар туфайли улар қийинчиликларга дуч келади ва Акиф уларга бу ҳолатдан чиқишига ёрдам беради. У Ўмер ва Асиега хусусий мактабга киришига кўмаклашади. Бу ерда камбағал ва бойлар, жиноятчилар ва қурбонларнинг тақдири бир-бирига боғланади. Сериалда қаҳрамонларнинг мураккаб вазиятлардан қандай чиқиши кўрсатиб берилган.
“Қўрғон сирлари”
Келишган йигит Ферит бадавлат оилада вояга етади ва истаган ишини қилишга одатланган бўлади. Кўп зиёфатлар, янги қизлар билан танишиш — бу келажак ёки ҳаётдаги бирор-бир ютуқлар ҳақида қайғурмайдиган йигитнинг одатий кундалик ҳаёти. Феритнинг бу хатти-ҳаракати бобоси, ҳурматга сазовор тадбиркор Холис оғани ранжитади. У ўз оиласини боқиш ва муносиб мавқега эришиш учун кўп меҳнат қилади ва ҳар бир топилган танганинг қадрини билади. Полициячилар Феритнинг уйига тинтувга келганларида, Холис оға неварасининг тақдирини ўз қўлига олиши кераклигини тушунади. У Феритга она шаҳри Антепдан муносиб келин топишга қарор қилади. Гўзал Сейран бу борада яхши танлов бўлади. Сериалда икки оила билан боғлиқ сирлар, муносабатлар ҳақида ҳикоя қилинади. “Қўрғон сирлари” — биз ўрганиб қолган одатий романтик сериал эмас. У психиатр Гулсерен Будайжиўғлининг китоби асосида реал воқеаларга асосланган.
“Сиздан гўзалроқ”
25 ёшли Эфсун чет элда шифокор бўлиб ишлайди. Кунлардан бир кун келишган нотаниш киши унинг олдига қимматбаҳо машинада келади. Эфсун “оқ отли шаҳзода” ортидан югурмайди: биринчидан, унинг бошқа шаҳзодалари бор, иккинчидан, у онасининг хабарчиси бўлиб чиқади. Бу ишбилармон аёл кўп йиллар олдин турмуш ўртоғи ва қизини ташлаб кетган. Эфсун ишини вақтинча Истанбул гўзаллик клиникасида давом эттиришга қарор қилади. Бироқ у қийинчиликларга дуч келади, сабаби ўзига ишонган жарроҳ аёл Эмир билан тил топишиши керак бўлади.
“Оила”
Девин ва Асланнинг тақдир йўллари Измирга саёҳат пайтида тасодифан кесишади. Аслан сирли клуб бизнесига эга бўлган бой оиланинг меросхўри, Девин эса ўз йўлини топишга ва синглисига ғамхўрлик қилишга мажбур. Турли жойдан келган, тасодифан учрашиб қолган инсоннинг умумий муаммоси бор — бу оилавий қийинчиликлар. Девин Асланга психолог сифатида маслаҳат бера бошлайди. Уларнинг бир-бирига бўлган ҳис-туйғулари мафияга ҳам зарба бера оладиган кучга айланади. Бироқ Асланнинг қудратли қариндошлари унинг ҳаётини мураккаблаштиришга ҳаракат қилади.
Изоҳ (0)