Brand Finance консалтинг компаниясининг йиллик ҳисоботига кўра, Amazon компанияси ўтган йил давомида қиймати 14,6 фоизга тушиб, 299,3 миллиард долларга баҳоланишига қарамай, энг қиммат технология брендлари рейтингида етакчилик қилмоқда.
Ўтган йилги рейтингда биринчи поғонани эгаллаган Apple бренди иккинчи ўринга тушиб кетди. Йил давомида унинг қиймати 16,2 фоизга тушиб, 297,5 миллиард долларни ташкил қилди.
Учинчи ўринни Google бренди (281,4 миллиард доллар) эгаллаган.
Хитойнинг Huawei компанияси глобал сиёсий муҳитнинг қийинчиликлари, яримўтказгич компонентлар тақчиллиги ва бутун дунё бўйлаб смартфонларга бўлган талабнинг пасайишига қарамай, энг қиммат технология брендлари ўнлигида қолишга муваффақ бўлди.
Муаммолар Huawei истеъмолчи қурилмалари бизнесига энг кўп таъсир қилди, бироқ компаниянинг бошқа корхоналари, жумладан, корпоратив сегмент ва алоқа ускуналари ишлаб чиқариш анча яхши натижаларга эришди.
Huawei брендининг қиймати ўтган йил давомида 38 фоизга камайиб, 44,3 миллиард долларни ташкил қилди.
Бу йил энг тез ривожланаётган технология бренди Япониянинг NТТ DАТА IT-компанияси бўлди (55% ўсиш, 8,9 миллиард доллар). Ўсиш бўйича иккинчи ўринни LinkedIn ижтимоий тармоғи эгаллади – бренд қиймати 49 фоизга ошиб, 15,5 миллиард долларга етди.
Изоҳ (0)