Ўзбекистон президентининг Жаҳон савдо ташкилоти (ЖСТ) бўйича махсус вакили, бош музокарачи Азизбек Ўрунов ва қишлоқ хўжалиги вазири ўринбосари Аҳадбек Ҳайдаров Женевага ташриф буюрди, деб хабар беради “Дунё” агентлиги.
Қайд этилишича, ташриф ташкилотга аъзо давлатларни Ўзбекистоннинг ЖСТга аъзо бўлиш жараёнларини фаоллаштириш бўйича амалга оширилаётган ишлар натижалари билан таништириш, шунингдек, Озарбайжоннинг ЖСТга аъзо бўлиш бўйича Ишчи гуруҳининг 15-йиғилишида иштирок этиш мақсадида ташкил этилган.
Ташриф доирасида Ўзбекистон делегацияси ЖСТ бош директори Нгози Оконжо-Ивеала, унинг ўринбосари Сянчен Чжан билан учрашган. Шунингдек, Лотин Америкаси, Осиё-Тинч океани минтақаси, Европа ва араб дунёсининг айрим мамлакатлари билан товар ва хизматлар бозорига чиқиш бўйича қатор икки томонлама музокаралар ўтказилган.
ЖСТ раҳбарияти Ўзбекистон президентининг яқинда қабул қилинган мамлакатнинг ташкилотга аъзо бўлиш жараёнини фаоллаштириш тўғрисидаги қарорини юқори баҳолаган. ЖСТ Котибиятининг Ўзбекистонга аъзо бўлиш жараёнида ҳар томонлама кўмак кўрсатиш ва юзага келаётган муаммоларни тезкорлик билан ҳал этиш учун икки томонлама ҳамкорликни фаоллаштириш мажбурияти билдирилган.
Нгози Оконжо-Ивеала, шунингдек, ЖСТ ташкилотига аъзо давлатлар билан икки томонлама ва кўп томонлама музокараларни қўллаб-қувватлаш мақсадида Ўзбекистонга техник кўмакни кенгайтиришга тайёрлигини маълум қилган. Шу нуқтаи назардан, томонлар бир қатор халқаро маслаҳатчилардан эксперт ёрдамини жалб қилиш имкониятларини муҳокама қилган.
Ташриф давомида делегация ЖСТ Котибияти билан биргаликда Ўзбекистоннинг ЖСТга аъзо бўлиши бўйича ишчи гуруҳининг 7-йиғилишини шартли равишда 2023 йил сентябрь—октябрь ойларида ўтказиш учун барча фундаментал ҳужжатлар тўпламини тайёрлаган.
Июнь бошларида Ўзбекистонда Жаҳон савдо ташкилоти масалалари бўйича махсус вакил лавозими жорий этилганди. ЖСТга аъзо бўлиш жараёнини жадаллаштириш, масъул вазирлик ва идоралар фаолиятининг натижадорлигини таъминлаш бўйича ишларни мувофиқлаштириш махсус вакилнинг асосий вазифаларидан бири ҳисобланади.
Ташкилотга аъзо бўлиш Ўзбекистонга нима беради?
Ўзбекистон ЖСТга аъзо бўлишдан бир неча жиҳатдан фойда кўриши мумкин:
Янги бозорларга чиқиш: ЖСТга аъзо бўлиш орқали Ўзбекистон бутун дунё бўйлаб кенгроқ бозорларга чиқиш имкониятига эга бўлади. Бу экспорт ҳажмини ошириш ва мамлакатда хорижий сармояларни кўпайтиришга ёрдам беради. Натижада иқтисодий ўсиш ошади ва кўпроқ иш ўринлари яратилади.
Яхшиланган савдо қоидалари: Ўзбекистон ЖСТ аъзоси сифатида халқаро савдо қоидалари ва талабларига риоя қилиши талаб қилинади. Бу мамлакатда ишбилармонлик муҳитини яхшилаш, савдо амалиётида шаффофликни ошириш ва коррупцияни камайтиришга ёрдам бериши мумкин.
Интеллектуал мулкни ҳимоя қилиш: ЖСТ интеллектуал мулк ҳуқуқларини ҳимоя қилиш учун асос яратади, бу Ўзбекистоннинг ўсиб бораётган технология ва ижодкорлик саноати учун муҳимдир.
Низоларни ҳал қилиш: ЖСТ халқаро савдо билан боғлиқ низоларни ҳал қилиш учун платформани тақдим этади. Ташкилотга қўшилиш орқали Ўзбекистон бошқа давлатлар билан низоларни адолатли ва холис ҳал этишга ёрдам берувчи механизмдан фойдаланиш имкониятига эга бўлади.
Умуман олганда, ЖСТга аъзо бўлиш Ўзбекистоннинг жаҳон иқтисодиётига тўлиқроқ интеграциялашувига, савдо амалиётини яхшилашга ва иқтисодий ривожланишга ёрдам беради. Бу бўйича музокаралар сўнгги йилларда анча олдинга силжиди.
Изоҳ (0)