Ижтимоий тармоқларда Қозоғистон Соғлиқни сақлаш вазирлиги табибларни расман тан олмоқчилиги ҳақида маълумот пайдо бўлди, деб хабар бермоқда “Дарё”нинг Қозоғистондаги мухбири.
Қозоғистон Соғлиқни сақлаш вазирлиги тушунтиришича, “Анъанавий тиббиёт.Табиб” профессионал стандарт лойиҳаси 2019—2021 йилларда Жаҳон банки лойиҳаси доирасида ишлаб чиқилган.
Лойиҳани ишлаб чиқиш мутахассислар иштирокида амалга оширилди ва муҳокама қилинмоқда. “Касбий малака тўғрисида”ги қонун лойиҳаси концепцияси доирасида 50 дан ортиқ мутахассислик бўйича соҳа учун касб стандартлари ишлаб чиқилмоқда. Ишлаб чиқилган лойиҳалар манфаатдор томонларга юборилди ва барча даражаларда босқичма-босқич муҳокама қилинади. Лойиҳа якунига етказилади, таклиф ва мулоҳазалар бўйича ўзгартиришлар киритилади, — дейилади ССВ матбуот хизмати хабарида.
Шу билан бирга, вазирликнинг хабар беришича, 2020 йил 7 июлда қабул қилинган “Халқ саломатлиги ва соғлиқни сақлаш тизими тўғрисида”ги кодексда алоҳида “Анъанавий тиббиёт.Табиб” моддаси мавжуд.
Қозоғистонлик тиббиёт мутахассисларидан айримлари вазирликнинг режасини дарҳол танқид қилган.
“Бутун цивилизациялашган дунё далилларга асосланган тиббиётга ўтган бир пайтда, Соғлиқни сақлаш вазирлигимиз анъанавий тиббиёт ва табиблик бўйича профессионал стандартни кўриб чиқмоқда. Баъманилик!” — деди “Олимп” клиник диагностика лабораториялари топ-менежери Алексей Балас.
Даволаш усулларини қўллашда инсон саломатлигига зарар етказган шахс Қозоғистон қонунларига мувофиқ жавобгарликка тортилади.
Изоҳ (0)