Молдова пойтахти Кишинёвдаги аэропортда отишма содир этган Тожикистон фуқароси Рустам Ашуров ҳибсга олиш вақтида олган жароҳатлари туфайли вафот этди, деб хабар бермоқда Молдова Ички ишлар вазирлиги полиция бош инспекцияси.
Deutsche Welle хабарига кўра, ҳибсга олиш вақтида Ашуров 10 та ўқ еган, касалхонада ўпкасининг бир қисми олиб ташланган. Тожикистонлик ҳушига келмай вафот этган.
Ашуров Кишинёвга Туркиядан учиб келган. Полиция маълумотларига кўра, у Душанбеда уюшган жиноий гуруҳ таркибида “Ориенбанк” ОАЖ раисининг биринчи ўринбосари Шуҳрат Исматуллаевни ўғирлашда иштирок этганидан кейин бошпана қидириб келган. Исматуллаев 23 июнь куни ўғирлаб кетилганди. Тожикистон ИИВ ўғирланган шахсни топишга ёрдам берадиган маълумот учун 30 минг доллар мукофот эълон қилган, бироқ ҳозирча бу натижа бермаган.
Аэропортдаги отишма паспорт назорати ходимлари Ашуровнинг Молдовага киришига рухсат бермаганидан кейин бошланган. Эркакнинг ортга қайтишини расмийлаштириш учун уни стерил зонага олиб кетишга қарор қилинган, бироқ у полициячининг қуролини тортиб олиб, ўқ узишни бошлаган.
Ҳодисада икки киши ҳалок бўлди: чегара полицияси ва аэропорт хавфсизлиги ходими, шунингдек, бир йўловчи жароҳат олди. Эркак аэропорт биноларидан бирида гаровга олинганлар билан ўзини тўсмоқчи бўлган, бироқ уни яралаб, ҳибсга олишган.
Молдова президент Майя Санду 4 июлни қурбонлар хотирасига миллий мотам куни деб эълон қилди.
Изоҳ (0)