Жиззах вилоятидан ўтган магистрал йўлда 7 та автомобиль иштирокида ЙТҲ содир бўлди. Бу ҳақда вилоят ИИБ ахборот хизмати хабар берди.
Хабарга кўра, ҳолат 30 июнь куни соат 10.50 ларда Тошкент—Термиз М-39 йўлининг 997-километрида содир бўлган. Бухорода яшовчи фуқаро бошқарувидаги Shacman шу йўналишда ҳаракатланаётган Самарқандда яшовчи фуқаро бошқарувидаги Epicaънинг орқасига урилган. Оқибатда Epica йўловчиси, Бухорода яшовчи фуқаро воқеа жойида вафот этган.
Худди шундай мазкур автоулов ичида бўлган Хива туманида яшовчи М.А. шифохонага ётқизилган, аммо кўрсатилган муолажаларга қарамасдан вафот этган. Бундан ташқари, ушбу ЙТҲ натижасида Тошкент шаҳри, Жиззах, Бухоро, Қашқадарё вилоятларида яшовчи шахслар бошқарувидаги Lacetti, Синотрук, HOWO, Cobalt, Nexia-3 тўқнашган.
Оқибатда мазкур машиналарга турли даражада техник шикаст етган. Ушбу автомашиналарда бўлган ҳайдовчи ва йўловчилар жабрланмаган. Ҳолат юзасидан тегишли тартибда жиноят иши қўзғатилиб, тергов ҳаракатлари олиб борилмоқда.
Маълум қилинишича, айни пайтда Жиззах шаҳрини Ғаллаорол тумани ва бошқа вилоятлар билан боғловчи Учтепа—Жиззах 4Р-38 йўлининг 34-35-километрлари оралиғида Сангзор дарёси устидаги кўприк таъмирланяпти. Шунингдек, мазкур йўлнинг 33-километрида йўл ўтказгич қурилмоқда. Мазкур жиҳат 4Р-38 йўлида автотранспорт воситалари ҳаракатининг чекланишига сабаб бўлган. Бу эса Тошкент—Термиз М-39 йўлининг 981 ва 1012-километрлари оралиғида автоуловлар ҳаракатининг сезиларли даражада ортишига олиб келган.
Изоҳ (0)