Қаршида тадбиркорлик фаолиятини қонунга хилоф равишда қайта текширган мансабдор шахс жаримага тортилди. Бу ҳақда Президенти ҳузуридаги Тадбиркорлик субъектларининг ҳуқуқлари ва қонуний манфаатларини ҳимоя қилиш бўйича вакил хабар берди.
Маълумки, президентнинг 2022 йил 13 сентябрдаги қарорига кўра, назорат қилувчи органлар тадбиркорлик субъектининг илгари текширилган фаолият давридаги предмети ва объекти бўйича қайта текширув ўтказишга ва тадбиркорлик субъекти томонидан аввал тақдим этилган ҳужжатларни талаб қилишга ҳақли эмас. Бизнес-омбудсманнинг маълум қилишича, шунга қарамай, айрим назорат органлари томонидан тадбиркорлик субъектларини қонунга хилоф равишда қайта-қайта текшириш ҳолатлари учрамоқда.
Хусусан, Қарши шаҳрида фаолият юритувчи “П.Б.Д” МЧЖнинг (номи ўзгартирилган) фаолияти солиқ органи томонидан муқаддам камерал солиқ текширувидан ўтказилган бўлса-да, Қашқадарё вилояти солиқ бошқармаси мансабдор шахси тадбиркорлик субъектининг мазкур даврдаги фаолиятини қонунга хилоф равишда қайта текшириш ташаббуси билан чиққан.
Шу боис Бизнес-омбудсман девони томонидан маъмурий жавобгарликка тортилиб, унга нисбатан БҲМнинг 20 баравари (6,6 миллион сўм)миқдорида жарима жазоси тайинланди.
Бундан ташқари, “П.Б.Д” МЧЖда қонунга хилоф равишда бошланган камерал солиқ текшируви тугатилган.
Изоҳ (0)