Навоий вилоятининг Навоий шаҳрида Ободонлаштириш бошқармаси бошлиғи лавозимида ишлаб, давлатнинг 1 миллиард 53 миллион сўм миқдоридаги маблағини талон-торож қилган мансабдор Юсуф Турсунов яна бошқарма бошлиғи лавозимига қайтди. Бу ҳақда Навоий шаҳри ҳокими М.Эгамқуловнинг 2023 йил 21 июнь куни имзоланган қарорида маълум қилинган.
Қарорда Турсунов ушбу лавозимга уч ойлик синов муддати билан тайинлангани қўшимча қилинган.
“Дарё” давлат пулини ўзлаштиришда айбланган Юсуф Турсуновнинг яна айнан ўша лавозимга қайтиш сабабини аниқлаш мақсадида қарор ижросини таъминлашга масъул бўлган, ҳокимликнинг ташкилий кадрлар гуруҳи раҳбари Шаҳобиддин Холбоев билан суҳбатлашди.
Журналист Шаҳобиддин Холбоевга “айнан шу лавозимда ишлаган пайтида давлат маблағини ўзлаштирган мансабдорни яна айнан ўша лавозимга қайтариш қанчалик мантиқли”, деган саволга жавоб берар экан “Мен Сизнинг саволингизга аниқ жавоб беришим учун ҳолатни батафсил ўрганиб, бу ҳақда расмий муносабат ҳам берамиз“, деди.
Шаҳобиддин Холбоев журналист саволига жавоб беришдан тийилар экан Юсуф Турсунов бу лавозимга уч ойлик синов муддати билан тайинланганини, уни бу лавозимга тайинлашда суднинг аввалги қарорларидаги жазо тури ва муддати ўталгани ҳисобга олинганини қўшимча қилди.
Кези келганда таъкидлаш керакки, суд ҳукмига кўра, Юсуф Турсунов 2019 йилда бошқарма бош ҳисобчиси У.Хафизов, “Paradise System Service” МЧЖ мансабдор шахслари билан жиноий тил бириктириб, 690 дона кўча чироғини сотиб олиш учун жами 997 миллион сўм маблағни жамият ҳисоб рақамига кўчирган. Аниқланишича, мазкур турдаги чироқнинг бир донаси 384 минг сўм бўлган, мансабдор эса чироқнинг ҳар бирига 1 миллион 240 минг сўмдан пул тўлаб, ушбу маблағнинг 732 миллион сўмини талон-торож қилган.
Шунингдек, у донаси 384 минг сўм бўлган 700 дона Slatek LED Street Light-200W кўча чироғи 650 минг сўмдан ҳамда ҳар бирининг донаси 272,2 минг сўм бўлган 650 дона Energomax EMX-0103/150W кўча чироғини 480 минг сўмдан сотиб олиб, бу сафар 321 миллион 220 минг сўмни “еб кетган”.
Юсуф Турсунов жиноят ишлари бўйича Навоий шаҳар судининг 2021 йил 4 мартдаги ҳукмига асосан, Жиноят кодексининг 167-моддаси 3-қисми “а” банди ва 209-моддаси 2-қисми “а” банди билан айбли деб топилиб, Жиноят кодексининг 45-моддаси қўлланган ҳолда 1 йил 6 ой мансабдорлик ва моддий жавобгарлик ишларида ишлаш ҳуқуқидан маҳрум қилиниб, ойлик иш ҳақининг 10 фоизини давлат даромадига ушлаб қолган ҳолда 3 йил ахлоқ тузатиш ишлари жазосига тортилган. Навоий вилоят суди жиноят ишлари бўйича судлов ҳайъати апелляция инстанциясининг 2021 йил 18 августдаги ажрими билан биринчи инстанция суди ҳукмига қисман ўзгартириш киритилиб, Юсуф Турсуновга тайинланган ахлоқ тузатиш ишлари жазоси муддати 3 йилдан 2 йил 7 ойга қисқартирилган. Мансабдорлик ва моддий жавобгарлик ишларида ишлаш ҳуқуқидан маҳрум қилиш тарзидаги қўшимча жазо ўзгаришсиз қолдирилган.
Изоҳ (2)
зур
яхшику