“Арсенал” футболчиси Букайо Сака Туркиядаги зилзилалар оқибатида жабрланган 26 оилага турар-жой масаласида ёрдам берди.
Футболчи BigShoe хайрия лойиҳаси томонидан уюштирилган акцияда иштирок этиб, Туркия шарқидаги Адияман, Қаҳрамонмараш ва Малатядаги оилалар учун турар-жой пулини тўлаган. Оилалар барча шароитлари бўлган контейнерларга жойлаштирилади.
“Яшаш учун уйи бўлган ҳар бир киши ўзини омадли деб ҳисоблаши мумкин. Фалокат одамларни барча нарсаларидан айирди, бу уларнинг айби эмас. Уларга ёрдам бера олиш мен учун жуда муҳим”, — дейди “Арсенал” ва Англия терма жамоаси вингери.
Эслатиб ўтамиз, февраль ойида Туркия ва Сурияда кучли зилзила юз берди. Туркиянинг 11 вилоятида 50,5 минг киши ҳалок бўлди ва 107,204 киши жароҳат олди. Зилзила оқибатида “Ҳатайспор” клуби футболчиси Кристиан Ацу вафот этганди.
Изоҳ (0)