Бухоро вилояти Ромитан туманида 40 минг АҚШ долларига ер сотмоқчи бўлган шахс қўлга олинди. Бу ҳақда вилоят ИИБ матбуот хизмати хабар берди.
Маълум қилинишича, вилоят ИИБ ходимлари томонидан ўтказилган тезкор тадбир давомида Ромитан туманида яшовчи, 1968 йилда туғилган М.М. бошқа бир фуқаро У.Ж.ни алдаб, ишончига кириб, унга туман ҳокимлигининг захира ерлари ҳисобида бўлган, Ҳазорбоғ қишлоғи ҳудудида жойлашган умумий майдони 7,57 гектарга тенг бўлган ер майдонидан 3,5 гектарини унинг эгалигига ўтказиб беришини ваъда қилган.
Эвазига ундан 40 минг АҚШ доллари талаб қилган ва келишилган сумманинг бир қисми яъни, 10 минг долларни аванс сифатида фирибгарлик йўли билан олаётган вақтида ашёвий далиллар билан қўлга олинган.
Мазкур ҳолат юзасидан Бухоро шаҳар ИИО ФМБ томонидан фуқаро М.М.га нисбатан Жиноят кодексининг 168-моддаси 3-қисми билан жиноят иши қўзғатилиб, ҳозирда дастлабки тергов ҳаракатлари олиб борилмоқда.
Изоҳ (0)