Африканинг Руанда давлатидаги геноцид пайтида юзлаб одамларнинг ҳаётини сақлаб қолган Дамас Гисимба 61 ёшида вафот этди. 800 минг киши қирғин қилинган геноцид пайтида Гисимба ва укаси бошқарадиган меҳрибонлик уйи кўпчилик учун бошпанага айланган эди, деб ёзади The Guardian.
1994 йил 6 апрель куни Руанда президенти Жювенал Хабиаримана ўтирган самолёт уриб туширилган, унинг ўлимида туци исёнчилари айбланган эди. Бир неча соат ичида пойтахт Кигали ўраб олиниб, хуту кучлари томонидан тутси оилаларини қирғин қилиш бошланган. Эртаси куни одамлар бошпана излаб болалар уйига кела бошлаган. Шундан кейинги уч ой давомида Гисимба чодирда, подвалда ва хоналарда яширинган 400 дан ортиқ болалар ва катталарни ҳимоя қилган.
“Мен ва оиламнинг тирик қолиши сабабчиси — Дамас Гисимба. 1994 йилги геноцид пайтида биз меҳрибонлик уйида яшадик. У бизнинг оиламизни қабул қилди, ҳаётимизни сақлаб қолди”, — дейди геноцид гувоҳларидан бири.
У Қизил Хоч юборган егуликлар ёрдамида одамларни бир неча ой боққан ва милиция билан меҳрибонлик уйининг омон қолиши ҳақида музокаралар олиб борган. Гисимба, шунингдек, уй яқинида қазилган оммавий қабрдан икки чалажон аёлни олиб чиққан.
Геноциддан кейин ота-онасидан айрилган болалар ёрдам излаб меҳрибонлик уйига келишда давом этди. Моддий қийинчиликларга қарамай, Гисимба уларга ғамхўрлик қилди, овқатлантирди, мактабга қатнашини таъминлади.
Гисимба геноцид пайтидаги хизматлари учун мамлакат президентининг Умуринзи (ҳимоячи) ордени билан тақдирланган.
У ҳаётининг сўнгги йилларини гипертония ва буйрак муаммолари билан ўтказди. Раунда қаҳрамони 11 июнь куни Кигалидаги уйида вафот этди.
Изоҳ (0)